សៀមរាប ៖ តាមសេចក្ដីរាយការណ៍ពីមន្ដ្រីចរាចរណ៍ស្រុកពួកនៅព្រឹកថ្ងៃទី២១ ខែ ឧសភា ឆ្នាំ២០២០បានអោយដឹងថា គ្រោះថ្នាក់ចរាចរណ៏រវាងរថយន្តដឹកទឹកកកបុកនិងរថយន្តដឹកត្រី ក្នុងទិសដៅស្រប់គ្នាពីកើតទៅលិច កាលពីវេលាម៉ោង០៥និង៣០នាទីព្រឹក ថ្ងៃពុធ១៤រោច ខែពិសាខ ឆ្នាំជូត ទោស័ក ព•ស ២៥៦៤ ត្រូវនិងថ្ងៃទី២០ ខែឧសភា ឆ្នាំ២០២០ នៅចំណុចផ្លូវជាតិលេខ៦ត្រង់ចំណុចគីឡូម៉ែត្រលេខ ៣៥១-៣៥២ ក្នុងទឹកដីភូមិ កិត្តិយស ឃុំព្រៃជ្រូក ស្រុកពួក ខេត្តសៀមរាប ។
សមត្ថកិច្ចបានអោយដឹងថា រថយន្តម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពង់ចាម 3A.8376 ដឹកត្រី អ្នកបើកបរដោយឈ្មោះ សុខ យាងភារុត ភេទប្រុស អាយុ១៧ឆ្នាំ នៅភូមិថ្មដាកើត ឃុំទួលសុភី ស្រុកអូររាំងឪ ខេត្តកំពង់ចាម (រងរបួស) និង អ្នករួមដំណើរឈ្មោះ ជុន រដ្ឋធី ភេទប្រុស អាយុ ២៧ឆ្នាំ នៅភូមិថ្មដាលិច ឃុំទួលសុភី ស្រុកអូររាំងឪ ខេត្តត្បូងឃ្មុំ (រងរបួស) បានបើកបររថយន្ដក្នុងទិសដៅពីកើតទៅលិចបានបែកកង់មុខហើយជ្រុលទៅបុកជាមួយនិង រថយន្តម៉ាកហ៊ីយ៉ាន់ដាយ ពណ៍ក្រហម ពាក់ស្លាកលេខ កំពង់ស្ពឺ 3A.0115 បើកបរដោយឈ្មោះ រ៉េត សារឹទ្ធ ភេទប្រុស អាយុ២៧ឆ្នាំ នៅភូមិជ្រាស់ ឃុំល្វា ស្រុកពួក ខេត្តសៀមរាប បើកបរទិសដៅពីកើតទៅលិច ពេលបុកហើយ រថយន្តជ្រុលទៅបុកផ្ទះប្រជាពលរដ្ឋចំនួន២ខ្នង។
១- ម្ចាស់ផ្ទះរងគ្រោះ ឈ្មោះ ហង់ រឿង ភេទប្រុស អាយុ៦០ឆ្នាំ នៅភូមិ ឃុំកើតហេតុខាងលើ ផ្ទះឈើទំហំ5.20 X 8 m ប្រក់ស័ង្គសី ជញ្ជាំងក្ដា កម្ពស់2.50m បានដួលរលំទាំងស្រុង។ ២-ម្ចាស់ផ្ទះរងគ្រោះឈ្មោះជួន លេន ភេទប្រុស អាយុ៣៤ឆ្នាំ នៅភូមិ-ឃុំកើតហេតុខាងលើ ផ្ទះសង់អំពីដែក ទំហំ4 X 5 m ប្រក់ស័ង្គសី ជញ្ជាំងស័ង្កសី ។
បណ្តាលឲ្យមនុស្ស០១នាក់ឈ្មោះ រ៉េត សារឹទ្ធ ភេទប្រុស( ស្លាប់)និង៤នាក់ទៀតរងរបួសធ្ងន់និងស្រាលចំនួន៤នាក់) ១-ឈ្មោះ ជុន រដ្ឋធី (របួលធ្ងន់) , ២-ឈ្មោះ សុខ យាងភារុត (របួសស្រាល) , ៣-ឈ្មើហង់ បុត្រវីរះ ភេទប្រុស អាយុ២៩ឆ្នាំ(របួសស្រាល), ៤-ឈ្មោះ ណាត ចាន់ណា ភេទស្រីអាយុ២៧ឆ្នាំ (របួសស្រាល)។
ខូចខាតរថយន្ត០២គ្រឿងយ៉ាងដំណំ និង ខូចខាតផ្ទះប្រជាពលរដ្ឋ០២ខ្នង ១-សសរទល់រោធនិងឈើលើ រលំទាំងស្រុង , ២-ផ្ទះសង់អំពីដែក ផ្ទាល់ដី ប្រក់ស័ង្គសី ដំបូលស័ង្គសី ខូចខាតតិចតួច។ មូលហេតុ -រថយន្តដឹកត្រី បែកកង់មុខខាងស្ដាំរ៉េចង្កូតបណ្ដាលឲ្យមានគ្រោះថ្នាក់នេះកើតឡើង។
ក្រោយពេលកើតហេតុកម្លាំងផ្នែកសណ្ដាប់ធ្នាប់សាធារណៈនិងកម្លាំងប៉ុស្តិ៍នគរបាលរដ្ឋបាលបានចុះដល់កន្លែងកើតហេតុដើម្បីជួយអន្តរាគមន៍និងសង្គ្រោះបញ្ចូនជនរងគ្រោះទៅមន្ទីពេទ្យ និងស្ទូចរថយន្ដយកមករក្សាទុកនៅប៉ុស្ដិនគរបាលព្រៃជ្រូក។
លោក វរសេនីយ៍ឯក ទេព ពុំសែន អធិការស្រុកពួក បានអោយដឹងនៅព្រឹកថ្ងៃទី២១ ខែ ឧសភា ឆ្នាំ២០២០នេះថា គ្រោះថ្នាក់ចរណ៍នេះគឺបណ្ដាលមកពីរថយន្ដដឹកត្រីបែកកងរ៉េចង្កូតមកបុករថយន្ដដឹកទឹកក រួចបន្ដទៅបុកផ្ទះពលរដ្ន២ខ្នងបណ្ដាលអោយដួលរលំទាំងស្រុង និងបង្កអោយស្លាប់មនុស្ស១នាក់ និងរបួសធ្ងន់ស្រាល៤នាក់ ខូចខាតរថយន្ដ២គ្រឿង !រហូតមកដល់ពេលនេះម្ចាស់ផ្ទះទាំង២នាក់មិនទាន់ដាក់ពាក្យបណ្ដឹងទារសំណង់នៃការខូចខាតនៅឡើយទេដោយសារតែ សភាពខូចខាតមានទំហំធំនិងកំពុងតែពិនិត្យវាយតំលៃ ៕
ប៊ុនរិទ្ធី
