(ភ្នំពេញ)៖ ក្រុមការងារគ្រូពេទ្យស័គ្រចិត្តលោក ហ៊ុន ម៉ានី ប្រមាណជាជិត៤០នាក់ ដែលសុទ្ធសឹងតែគ្រូពេទ្យជំនាញៗ ទទួលបានការបណ្តុះបណ្តាលជំនាញថ្មី ដែលជាការងារមនុស្សធម៌មួយ ហើយវគ្គសិក្សានោះស្តីអំពី «ការងារចុះផ្សព្វផ្សាយ អប់រំ ចំណេះដឹង ដល់ សហគមន៍ និង ការងារបច្ចេកទេស ក្នុងប្រតិបត្តិការប្រយុទ្ធ ប្រឆាំង នឹងវ៉ីរុស COVID-19» ដែលជាគោលដៅធំមួយក្នុងការយកទៅអប់រំបន្ត ដល់ប្រជាពលរដ្ឋនៅតាមបណ្តារាជធានី និងខេត្ត។
ការបណ្តុះបណ្តាលស្តីអំពីការងារបច្ចេកទេស ក្នុងប្រតិបត្តិការប្រយុទ្ធ ប្រឆាំង នឹងវ៉ីរុស COVID-19 នេះ បានធ្វើឡើងក្រោមកិច្ចសហការជាមួយនឹងមន្ទីរសុខាភិបាលខេត្តព្រៃវែង ដែលដឹកនាំឡើងដោយលោក វេជ្ជបណ្ឌិត កែរ រដ្ឋា អនុប្រធានប្រតិបត្តិក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី និងជាប្រធានមន្ទីរសុខាភិបាលខេត្តស្វាយរៀង ទីតាំងនៃវគ្គបណ្តុះបណ្តាលនេះត្រូវបានធ្វើឡើងនៅមន្ទីរខេត្តស្វាយរៀងផ្ទាល់តែម្តង។
ឱកាសនោះ លោក វេជ្ជបណ្ឌិត កែរ រដ្ឋា បានឲ្យដឹងថា «ក្រុមការងារគ្រូពេទ្យស្ម័គ្រចិត្តឯកឧត្តមហ៊ុន ម៉ានី ចំនួន ៣៧នាក់ បានយកចិត្តទុកដាក់ប្រកបដោយវិជ្ជាជីវៈ ក្នុងការចុះ អប់រំផ្សព្វផ្សាយការបង្ការ និងការទប់ស្កាត់ នៃការរីករាលដាលជំងឺកូវីដ១៩ នេះខ្លាំងណាស់»។
ការងារមនុស្សធម៌នេះ ទទួលបានការចង្អុលបង្ហាញពីលោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺ ជាប្រធានគណៈកម្មការទី៧រដ្ឋសភា ជាប្រធាន ស.ស.យ.ក និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី ហើយលោកតែងតែលើកទឹកចិត្តដល់ក្រុមការងារគ្រូពេទ្យស្ម័គ្រចិត្តទាំងអស់ ទោះបីជាពួកគាត់មានការនឿយហត់យ៉ាងណាក្តី ក៏ត្រូវតែបន្តចុះអប់រំ និងព្យាបាលជូនប្រជាពលរដ្ឋ ដែលជាគោលដៅមួយធ្វើយ៉ាងណា ឲ្យប្រជាពលរដ្ឋមានសុខភាពល្អ។
ជាមួយគ្នានោះដែរ លោក លេង ផាលី រដ្ឋលេខាធិការក្រសួងផែនការ និងជាប្រធានប្រតិបត្តិក្រុមការងារគ្រូពេទ្យស្ម័គ្រចិត្តលោក ហ៊ុន ម៉ានី ក៏បាន បញ្ជាក់ថា «ខ្ញុំសូមថ្លែង អំណរគុណ យ៉ាង ជ្រាលជ្រៅ ចំពោះ លោក លោក ស្រី ដែល ជា គ្រូ បង្គោល នៃ មន្ទីរ សុខាភិបាល ខេត្ត ស្វាយរៀង ដែល បាន ចំណាយ ពេល វេលា ថ្ងៃ ឈប់សម្រាក ជួយ បណ្ដុះបណ្ដាលស្តីអំពី ការងារបច្ចេកទេស ក្នុងប្រតិបត្តិការប្រយុទ្ធ ប្រឆាំង នឹងវ៉ីរុស COVID-19 ដល់ ក្រុម ការងារ គ្រូពេទ្យ ស្ម័គ្រ ចិត្តឯកឧត្តម ហ៊ុន ម៉ានី យើងខ្ញុំ នាពេលនេះ»។
លោក លេង ផាលី ក៏បានបញ្ជាក់បន្ថែមទៀតថា លោកក៏បានចាត់ចែងក្រុមការងាររបស់លោកទៅតាមបណ្តាខេត្តមួយចំនួន ចុះទៅបន្តផ្សព្វផ្សាយ និងការអប់រំដល់ប្រជាពលរដ្ឋអោយបានដឹង និងយល់ច្បាស់ពីផលវិបាក និងវិធីសាស្ត្រទប់ស្កាត់ ធ្វើយ៉ាងណាមិនឲ្យមានការឆ្លងនៃវ៉ីរុសកូវីដ១៩។
សូមបញ្ជាក់ផងដែរថា ក្រុមការងារគ្រូពេទ្យស័គ្រចិត្តលោក ហ៊ុន ម៉ានី ដែលមានការចង្អុលបង្ហាញដោយផ្ទាល់ពីលោក ហ៊ុន ម៉ានី បានអនុវត្តការងារមនុស្សធម៌ ដោយចុះផ្សព្វផ្សាយអំពីវិធានការទប់ស្កាត់ នៃការឆ្លងរីករាលដាលរបស់វ៉ីរុសកូវីដ១៩ ចាប់តាំងពីពាក់កណ្តាលខែកុម្ភៈ ឆ្នាំ២០២០ ដើម្បីធ្វើយ៉ាងណាឲ្យប្រជាពលរដ្ឋតាមតំបន់ដាច់ស្រយ៉ាលយល់កាន់តែច្បាស់ ពីផលប៉ះពាល់ និងវិធានការទប់ស្កាត់៕
