នៅព្រឹកថ្ងៃទី០៨ ខែមករាឆ្នាំ ២០២៣ រដ្ឋបាលខេត្តកំពង់ចាម បានរៀបចំមីទ្ទិញខួបអនុស្សាវរីយ៍លើកទី៤៤ នៃទិវាជ័យជំនះ ៧ មករា ១៩៧៩-២០២៣ នៅបរិវេណទីលានខាងមុខវិមានឯករាជ្យ ខេត្តកំពង់ចាម ក្រោមអធិបតីភាព ឯកឧត្តម យឹម ឆៃលី ឧបនាយករដ្ឋមន្ត្រី ប្រធានក្រុមប្រឹក្សាស្ដារអភិវឌ្ឍវិស័យកសិកម្មនិងជនបទនិងជាប្រធានក្រុមការងាររាជរដ្ឋាភិបាលចូលមូលដ្ឋានខេត្តកំពង់ចាម និងក្រុមការងាររាជរដ្ឋាភិបាលចុះមូលដ្ឋាន ខេត្តកំពង់ចាម សមាជិកព្រឹទ្ធសភាភូមិភាគ២ អ្នកតំណាងរាស្ត្រមណ្ឌលខេត្តកំពង់ចាម ព្រមទាំង ព្រះសង្ឃ មន្ត្រីរាជការបណ្ដាមន្ទីរ អង្គភាពជុំវិញខេត្ត កងកម្លាំងទាំងបីប្រភេទ សិស្សានុសិស្ស និងប្រជាពលរដ្ឋយ៉ាងច្រើនកុះករ ។
បន្ទាប់ពី ឯកឧត្តម អ៊ុន ចាន់ដា អភិបាលខេត្ត នៃគណៈអភិបាល ខេត្តកំពង់ចាម អានសារលិខិត របស់សម្ដេចអគ្គមហាសេនាបតីតេជោ ហ៊ុន សែន រួចមក ឯកឧត្តម ឧបនាយករដ្ឋមន្ត្រី យឹម ឆៃលី បានមានប្រសាសន៍ថា ជាការពិត ការរំលឹកខួបអនុស្សាវរីយ៍លើកទី៤៤ នៃទិវាជ័យជំម្នះ ៧ មករា គឺផ្សាភ្ជាប់គ្នា នៃដំណើរប្រវត្តិសាស្ត្រ ២០ មិថុនា ១៩៧៧ នៅកោះថ្ម ជាថ្ងៃដែលសម្ដេចតេជោធ្វើដំណើរឆ្លងកាត់ ទៅកាន់ប្រទេសវៀតណាម ដើម្បីរៀបចំការតស៊ូផ្នែកយោធារំដោះប្រទេសជាតិ និងប្រជាជនកម្ពុជា ពីរបបប្រល័យពូជសាសន៍ ប៉ុល ពត។ ឯកឧត្ដមឧបនាយករដ្ឋមន្ត្រី មានប្រសាសន៍បន្តថា នេះជាប្រវត្តិសាស្ត្រដែលតភ្ជាប់គ្នា ជាមួយនឹងការបង្កើតរណសិរ្សសាមគ្គីសង្គ្រោះជាតិកម្ពុជា ២ ធ្នូ គឺរចនាសម្ព័ន្ធអង្គការចាត់តាំង ខាងយោធាកើតមុន និងអង្គការចាត់តាំង ខាងនយោបាយកើតក្រោយ ។ ទាំងអស់នេះ គឺជាការរំលឹកយើងទាំងអស់គ្នា ឱ្យដឹងថា បើគ្មានថ្ងៃ ២០ មិថុនា ១៩៧៧ ក៏គ្មានថ្ងៃ ១២ ឧសភា ១៩៧៨ នៃការកកើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ហើយបើគ្មានថ្ងៃ ១២ ឧសភា ១៩៧៨ ក៏គ្មានថ្ងៃ ២ ធ្នូ ១៩៧៨ នៃការបង្កើតរណសិរ្សសាមគ្គីសង្គ្រោះជាតិកម្ពុជា ហើយបើគ្មានថ្ងៃ ២ ធ្នូ ១៩៧៨ ក៏គ្មានថ្ងៃ ៧ មករា ១៩៧៩ ផងដែរ ។ ឯកឧត្តម ឧបនាយករដ្ឋមន្ត្រី បញ្ជាក់ថា នេះជារបត់ នៃប្រវត្តិសាស្ត្រប្រទេសកម្ពុជា ដើម្បី រំដោះប្រទេសជាតិ និងប្រជាជន ពីភាពអត់ឃ្លាន និងការកាប់សម្លាប់ប្រជាជនខ្លួនឯង នៃរបបប្រល័យពូជសាសន៍ ប៉ុល ពត ។
ឯកឧត្តម ឧបនាយករដ្ឋមន្ត្រី បានថ្លែងបន្តថា ជំនួសមុខឲ្យថ្នាក់ដឹកនាំរាជរដ្ឋាភិបាលកម្ពុជា សូមថ្លែងអំណរគុណដ៍ស្មោះស្ម័គ្រ ចំពោះប្រជាជនទាំងអស់នៅក្នុងខេត្តកំពង់ចាម ដែលបានចូលរួមតាមគ្រប់មធ្យោបាយ ដើម្បី រួមចំណែកអភិវឌ្ឍប្រទេសជាតិយើង ឲ្យមានការរីកចម្រើនលើគ្រប់វិស័យ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន ជាអគ្គមគ្គុទ្ទេសក៍ដ៍ឆ្នើម របស់ជាតិយើង ។ ម្យ៉ាងទៀត ក្នុងឱកាសដ៏ថ្លៃថ្លនេះ ឯកឧត្តមឧបនាយករដ្ឋមន្ត្រី ក៏សូមកោតសរសើរ ដ៏ស្មោះស្ម័គ្រ ចំពោះ ថ្នាក់ដឹកនាំ និងមន្ត្រីរាជការគ្រប់ជាន់ថ្នាក់ទាំងអស់ នៅក្នុងខេត្តកំពង់ចាម ដែលបានខិតខំប្រឹងប្រែង ធ្វើឲ្យសម្រេចរាល់ភារកិច្ច ដែលរាជរដ្ឋាភិបាលប្រគល់ជូន ក្នុងការបម្រើប្រជាជន នៅក្នុងវិស័យនានា នៃដែនសមត្ថកិច្ចរបស់ខ្លួន ផងដែរ ៕
ប្រភព៖ រដ្ឋបាលខេត្តកំពង់ចាម
