ព្រះវិហារ៖ លោក ស៊ុម ស៊ីវុត្ថា ដែលជានាយផ្នែករដ្ឋបាលព្រៃឈើរវៀង ត្រូវបានសាលាដំបូងខេត្តព្រះវិហារ ចេញដីការកោះហៅ ដើម្បីសាកសួរពាក់ព័ន្ធនឹងសំណុំរឿង រំលោភកាន់កាប់អចលវត្ថុ និងគំរាមកំហែងថានឹងសម្លាប់ ប្រព្រឹត្តិនៅភូមិរំចេក ឃុំរមណីយ ស្រុករវៀង ខេត្តព្រះវិហារ កាលពីថ្ងៃទី២០ ខែធ្នូ ឆ្នាំ២០២១ ។
បើតាមដីការបស់លោក ថុល គឹមហ៊ឹង តំណាងអយ្យការអមសាលាដំបូងខេត្តព្រះវិហារ ដែលចេញកាលពីថ្ងៃទី១៧ ខែមីនា ឆ្នាំ២០២២កន្លងទៅនេះ បានកោះហៅ លោក ស៊ុម ស៊ីវុត្ថា ភេទប្រុស ជាជនសង្ស័យ មានទីលំនៅបច្ចុប្បន្នក្នុងភូមិរំចេក ឃុំរមណីយ ស្រុករវៀង ខេត្តព្រះវិហារ ឲ្យចូលទៅកាន់អយ្យការអមសាលាដំបូង ខេត្តព្រះវិហារ នៅថ្ងៃទី២៩ ខែមីនា ឆ្នាំ២០២២ វេលាម៉ោង ២រសៀល ដើម្បីធ្វើការសាកសួរ។
នៅក្នុងដីកាបានបញ្ជាក់ទៀតថា សាម៉ីខ្លួនត្រូវអញ្ជើញ តាមដីកាកោះនេះឲ្យទាន់ពេលវេលា និងយកលិខិតផ្សេងៗ ដែលទាក់ទិននឹងរឿងខាងលើទៅជាមួយប្រសិនមាន៕
