(ខេត្តកែប)៖ នៅព្រឹកថ្ងៃសុក្រ ១១កេីត ខែចេត្រ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី ០៣ ខែមេសា ឆ្នាំ ២០២០ នេះ លោក កែន សត្ថា អភិបាលនៃគណៈអភិបាលខេត្តកែប បានអញ្ជេីញដឹកនាំកិច្ចប្រជុំ ដេីម្បីពិនិត្យ និងផ្តល់យោបល់លេីសេចក្តីព្រាងផែនការអភិវឌ្ឍន៍ខេត្ត ក្នុងគោលបំណងឱ្យសៀវភៅផែនការអភិវឌ្ឍន៍រយៈពេល ប្រាំ ឆ្នាំ (២០២០-២០២៤)របស់រដ្ឋបាលខេត្ត។
កិច្ចប្រជុំនេះ ក៏មានការអញ្ជើញចូលរួមពីសំណាក់ លោក លោកស្រី សមាជិកក្រុមប្រឹក្សាខេត្ត លោក លោកស្រី ជាអភិបាលរងខេត្ត អភិបាលក្រុង ស្រុក កម្លាំងប្រដាប់អាវុធទាំងបី លោកប្រធាន អនុប្រធាន មន្ទីរអង្គភាពទូទាំងខេត្ត និងមន្ត្រីចំណុះក្នុងរដ្ឋបាលខេត្តទាំងមូល។
មានមតិលើកឡើងក្នុងកិច្ចប្រជុំនេះ លោក កែន សត្ថា អភិបាលខេត្តកែប បានបញ្ជាក់ថា រដ្ឋបាលខេត្តចាំបាច់ត្រូវអនុវត្តផែនការខាងលើទៅតាមការគ្រោងទុក ព្រោះខេត្តមានលក្ខណៈគ្រប់គ្រាន់ ទាំងទម្រង់ អត្ថន័យ និងខ្លឹមសារស្របតាមក្របខ័ណ្ឌច្បាប់ និងមានសង្គតិភាព ជាមួយគោលនយោបាយជាតិ ច្បាប់ លិខិតបទដ្ឋានគតិយុត្ត និងសេចក្តីណែនាំនានាជាធរមាន។
លើសពីនេះ ដើម្បីធ្វើឱ្យផែនការអភិវឌ្ឍន៍ប្រកបដោយប្រសិទ្ធភាព លោក កែន សត្ថា អភិបាលខេត្តកែប បានជំរុញដល់មន្ទីរអង្គភាពពាក់ព័ន្ធទាំងអស់ត្រូវយកចិត្តទុកដាក់់ និងបន្តសហការគ្នាឱ្យបានល្អ ដើម្បីអភិវឌ្ឍន៍ខេត្តទេសចរណ៍របស់យើងឱ្យកាន់តែមានសក្តានុពលខ្លាំងក្លាថែមទៀត៕
