(រដ្ឋបាលខេត្តកំពង់ធំ)៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានជម្រុញឲ្យមន្ត្រីជំនាញ រួមគ្នាសហការជាមួយអាជ្ញធរមូលដ្ឋាន ដើម្បីពន្លឿនការចុះវាស់វែងក្បាលដីជាក់ស្តែង លើទីតាំងដីអាស្រ័យផល ក្នុងតំបន់បី ដើម្បីកាត់ឆ្វៀលចេញពីតំបន់៣ ជូនប្រជាពលរដ្ឋទៅតាមចំនួនគ្រួសារ ចំនួនផ្ទៃដី ដោយគោរពតាមគោលការណ៍ណែនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងមួយគ្រួសារត្រូវទទួលបាន ៥ហិចតា។
ការលើកឡើងនេះ ត្រូវបានឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ នាព្រឹកថ្ងៃទី៣០ ខែមករា ឆ្នាំ២០២២ ក្នុងពិធីអញ្ជើញជាអធិបតី ចុះសាកសួរសុខទុក្ខ សិក្សាស្វែងយល់អំពីជីវភាពរស់នៅ និងស្តាប់នូវសំណូមពរ ព្រមទាំងបញ្ហាមួយចំនួនរបស់ប្រជាពលរដ្ឋ ស្ថិតនៅក្នុងភូមិគោគត្របែក ឃុំស្រឡៅ ស្រុកតាំងគោក ខេត្តកំពង់ធំ ។ ពិធីនេះ ក៏មានការអញ្ជើញចូលរួមអមដំណើរពីឯកឧត្តម ងួន រតនៈ អភិបាលខេត្តកំពង់ធំ និងសហការី ព្រមទាំងថ្នាក់ដឹកនាំជាច្រើនរូបផ្សេងទៀត។
ជាមួយគ្នានោះដែរ ឯកឧត្តម ងួន រតនៈ អភិបាលខេត្តកំពង់ធំ បានថ្លែងអំណរគុណដល់ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ដែលបានជួយសាងសង់ផ្លូវលំមួយខ្សែ តភ្ជាប់ពីថ្នល់ជាតិលេខ៦ ទៅដល់ភូមិគោកត្របែក ដែលជាភូមិចាស់បុរាណមួយនៅដាច់ស្រយាល ដើម្បីជួយសម្រួលក្នុងការធ្វើដំណើរ ក្នុងការដឹកជញ្ជូនកសិផល អនុផល ធនធានធម្មជាតិ ក៏ដូចជាការទំនាក់ទំនងទៅវិញទៅមក ។
ឯកឧត្តមបានបន្ថែមទៀតថា កន្លងមក យើងទទួលបាននូវអនុសាសន៍ដ៏ខ្ពង់ខ្ពស់របស់សម្ដេចតេជោ ទាក់ទងទៅនឹងការផ្ដល់ដីអាស្រ័យផល ពាក់ព័ន្ធជាមួយនឹងចំនួនមនុស្ស ចំនួនដី និងទំហំផ្ទៃដីនៅក្នុងតំបន់នេះ នៅមិនទាន់បានបញ្ចប់ ហើយក្រុមការងារថ្នាក់ខេត្តបានខិតខំចុះវាស់វែងក្បាលដីនៅក្នុងតំបន់នេះ រហូតទទួលបានសលាកប័ត្របានមួយចំនួនផងដែរ ប៉ុន្តែនៅមិនទាន់បានរួចរាល់នៅឡើយទេ នៅតែបន្តធ្វើទៅតាមនីតិវិធីបន្តទៀត ចំនួនគ្រួសារ ចំនួនផ្ទៃដី និងទីតាំងដីដែលត្រូវធ្វើរបាយការណ៍ជូនប្រមុខរាជរដ្ឋាភិបាល ។
ឆ្លៀតក្នុងឱកាសនោះដែរ ឯកឧត្តមបណ្ឌិត ថោង ខុន បានជំរុញដល់មន្ត្រីជំនាញ សូមបន្តចុះវាស់វែងថែមទៀត និងជួបជាមួយគ្រួសារជាក់ស្តែង ពីព្រោះកន្លងមកមានតែគ្រួសារ អត់មានមនុស្ស។ ឯកឧត្តមបន្ថែមទៀតថា ការចុះវាស់វែងនេះ គឺមានតែបងប្អូនប្រជាពលរដ្ឋដែលមានទីលំនៅពិតប្រាកដក្នុងតំបន់នេះ ដែលកំពុងអាស្រ័យផល ដែលត្រូវទទួលបានដីនេះ សម្រាប់មួយគ្រួសារទទួលបានដីអាស្រ័យផល ចំនួន ៥ហិចតា ។
ឯកឧត្តមបណ្ឌិតបញ្ជាក់ថា ដីអាស្រ័យផល មានន័យថា បងប្អូនមានសិទ្ធប្រើប្រាស់អាស្រ័យផលបាន ប៉ុន្តែមិនមានសិទ្ធិលក់ដូរបាននោះទេ។
លើសពីនេះទៀត ឯកឧត្តមបណ្ឌិត ថោង ខុន បានសំណូមពរដល់បងប្អូនប្រជាពលរដ្ឋទាំងអស់ សូមសម្តែងនូវភាពស្មោះត្រង់នៅលើទីតាំងដីដែលបានអាស្រ័យផល ដើម្បីបង្កភាពងាយស្រួលដល់ក្រុមការងារក្នុងការចុះវាស់វែងបានច្បាស់លាស់ និងឆាប់រហ័ស ព្រមទាំងអំពាវនាវដល់បងប្អូនប្រជាពលរដ្ឋទាំងអស់ សូមចូលរួមចាក់វ៉ាក់សាំងការពារជំងឺកូវីដ១៩ទាំងអស់គ្នា ដើម្បីរួមគ្នាទប់ស្កាត់ការឆ្លងរីករាលដាលជំងឺកូវី១៩ ចូលក្នុងសហគមន៍។
