(ខេត្តកំពត)៖ ជាការឆ្លើយតប យ៉ាងយកចិត្តទុកដាក់ចំពោះអនុសាសន៍ណែនាំដ៏ខ្ពង់ខ្ពស់របស់ប្រមុខរាជរដ្ឋាភិបាល គឺសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានអំពាវនាវ ផ្ដាំផ្ញើចំពោះអាជ្ញាធរគ្រប់លំដាប់ថ្នាក់រួមនឹងប្រជាពលរដ្ឋ សប្បុរសជនគ្រប់មជ្ឈដ្ឋានឱ្យមានការរួបរួមសាមគ្គីគ្នា ជាកម្លាំង ដើម្បីរួមចំណែករំលែកការលំបាក ស្របពេលដែលប្រទេសកម្ពុជាកំពុងទទួលរងនូវវិបត្តិសាកល នៃការឆ្លងរាតត្បាតជំងឺកូវីត១៩ឬកូរ៉ូណា ដែលជាបន្ទុកធ្ងន់ធ្ងរលើរាជរដ្ឋាភិបាល។
ជាមួយគ្នាបេះដែរ នៅព្រឹកថ្ងៃទី៣០ ខែមីនា ឆ្នាំ២០២០ លោក ជាវ តាយ អភិបាល នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ព្រមទាំង លោក លោកស្រី សមាជិកគណៈកម្មាធិការសាខា សមាជិកកិត្តិយសសាខា អាជ្ញាធរ ក្រុង ស្រុក និងថ្នាក់ដឹកនាំខេត្ត មន្ទីរ អង្គភាពជុំវិញខេត្ត បានចូលរួមធ្វើពិធីប្រគល់អំណោយមនុស្សធម៌របស់សាខាកាកបាទក្រហមកម្ពុជាខេត្ត និងអំណោយរបស់រដ្ឋបាលខេត្តកំពត ជូនដល់ អាជ្ញាធរ និងអនុសាខាកាកបាទក្រហមក្រុង ស្រុកទាំង៨ ក្នុងខេត្តកំពត សម្រាប់យកទៅបម្រើសកម្មភាពប្រយុទ្ធនឹងជម្ងឺកូវីដ១៩ នៅបណ្ដា ឃុំ សង្កាត់ទាំង៩៣ ក្នុងខេត្តកំពត។
លោក ជាវ តាយ បានមានប្រសាសន៍ក្នុងឱកាសនោះថា ក្រោយពេលមានការផ្ទុះឡើងនៃជំងឺ(កូវីត១៩) នៅប្រទេសកម្ពុជា អាជ្ញាធរខេត្តកំពត បានខិតខំប្រឹងប្រែងធ្វើកិច្ចការងារជាច្រើន ដូចជាការចុះអប់រំផ្សព្វផ្សាយអំពីជំងីកូវីត១៩ ចុះណែនាំអំពីវិធីបង្ការ ការធ្វើអនាម័យរស់នៅ តាមមូលដ្ឋាន ចុះបាញ់ថ្នាំសម្លាប់មេរោគ នៅតាមតំបន់ និងមូលដ្ឋានប្រឈមនឹងការឆ្លងមេរោគជាច្រើនកន្លែង។
ថ្មីៗនេះរដ្ឋបាលខេត្តក៏បានរៀបចំបន្ទប់ត្រៀមបម្រុងសម្រាប់ដាក់អ្នកជំងឺកូវីត ក្នុងករណីឆ្លងច្រើន ជាង១៥០បន្ទប់ មានទាំងផ្ទះសំណាក់ និងអគារសាលារៀន ហើយរហូតមកដល់ពេលនេះខេត្តកំពត មានអ្នកឆ្លងជំងឺកូរវិត១៩ តែចំនួនពីរករណីប៉ុណ្ណោះនឹងបានព្យាបាលជាសះស្បើយចំនួន១នាក់ហើយផងដែរ។
លោក ជាវ តាយ ក៏បានសម្ដែងអំណរគុណនិងកោតសរសើរព្រមទាំងបានចាត់ទុកសកម្មភាពទាំងអស់ខាងលើ មិនអាចខ្វះបានឡើយ ពីការចូលរួមជំរុញ លើកទឹកចិត្ត តាមរយៈអំណោយជាសម្ភារៈ ថវិការបស់សប្បុរសជន និងសកម្មភាពរបស់អាជ្ញាធរ កងកម្លាំងប្រដាប់អាវុធនិងស្ថាប័នកាកបាទក្រហម គ្រប់ថ្នាក់ គ្រប់ផ្នែកព្រមទាំង កម្លាំងយុវជន និងអ្នកពាក់ព័ន្ធផ្សេទៀត ដែលបានខិតខំយកចិត្តទុកដាក់អស់កម្លាំងកាយចិត្តក្នុងការចុះផ្សព្វផ្សាយដល់បងប្អូនប្រជាពលរដ្ឋឱ្យយល់ដឹងអំពីវិធានការការពារនិងបង្ការជំងឺឆ្លង កូវីដ១៩ ដ៏កាចសាហាវនេះ។
លោក ជាវ តាយ ក៏បានបញ្ជាក់ទៀតថា អំណោយដែលបានប្រគល់នាពេលនេះ គឺពិតជាការរួមចំណែកក្នុងសកម្មភាពនានា ដើម្បីប្រយុទ្ធនឹងជំងឺកូវីត១៩ និងដើម្បីជួយរំលែង ការលំបាក ខ្វះខាត សម្រាប់ប្រជាពលរដ្ឋផង និងអ្នកដែលចុះបំពេញបេសសកម្ម ការពារទប់ស្កាត់ និង ប្រយុទ្ធប្រឆាំងនឹងកូវីត១៩ផង ខណៈដែលរាជរដ្ឋាភិបាលកម្ពុជាបាននឹងកំពុងយកចិត្តទុកដាក់អំពាវនាវ និងណែនាំដល់គ្រប់ស្ថាប័នរដ្ឋ វិស័យឯកជន អង្គការជាតិ អន្តរជាតិ នឹងប្រជាពលរដ្ឋ រួមគ្នាប្រយុទ្ធនឹងជំងឺឆ្លង កូវីដ១៩ដែលជាជំងឺរាតត្បាតជាសកល។
លោក ជាវ តាយ ក៏បានផ្ដាំផ្ញើដល់អាជ្ញាធរ និងអនុសាខាកាកបាទក្រហមថ្នាក់ក្រុង ស្រុក ទាំង៨ ក្រោយពីទទួលអំណោយ អង្ករនិងសំភារៈប្រើប្រាស់ពេលនេះ ត្រូវបន្តយកចិត្តទុកដាក់ ចែកចាយដល់មូលដ្ឋាន ឃុំសង្កាត់របស់ខ្លួន ទាំង៩៣ ក្នុងខេត្តដើម្បីទប់ស្កាត់ការឆ្លងជំងឺដ៏កាចសាហាវនេះឱ្យមានប្រសិទ្ធភាព ពិសេសបន្តការផ្សព្វផ្សាយ សារជាសំឡេង និងខិតប័ណ្ណ ស្ដីពីវិធានការ បង្ការ និងទប់ស្កាត់ការឆ្លងជំងឺកូវីដ១៩ នៅតាមបណ្ដាក្រុង ស្រុកឃុំសង្កាត់ និងភូមិឲ្យបានជាប្រចាំ និងត្រូវយកចិត្តទុកដាក់ចូលរួមសហការ អនុវត្តបទបញ្ជារបស់សម្ដេចតេជោ ហ៊ុន សែន លើករណីឱសថស្ថានដែលមានលក់ឧបករណ៍ធ្វើតេស្តរកកូរវិត ១៩។
អំណោយ ដែលបាន ប្រគល់ជូនរដ្ឋបាលក្រុង ស្រុកទាំង៨ និងឃុំ សង្កាត់ទាំង៩៣ នាពេលនេះ សរុបរួមមាន អង្ករចំនួន១៤តោន ឧបករណ៍វាស់កម្តៅចំនួន១០១គ្រឿង ម៉ាស់ការពារ១០០ប្រអប់ស្មើ៥០០០ម៉ាស ទឹកអាកុលលាងដៃ ២៨ធុង ស្មើ៧៦០លីត្រ អាកុលដបតូច៤០០ដប សាប៊ូដុំ៤០០ដុំ ស្ទិកគ័រអប់រំ៤០០សន្លឹកផងដែរ៕
