(រដ្ឋបាលខេត្តកំពង់ធំ): ឯកឧត្តម ងួន រតនៈ អភិបាលខេត្តកំពង់ធំ និងឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្មសំណង់ និងសុរិយោដី ដឹកនាំក្រុមការងារចំ ចុះដាំកូនឈើចំរុះប្រមាណជាង ៤ពាន់ដើម ក្នុងនោះមាន ត្នោត ឬស្សី និងរាំង នៅលើដីអភិរក្សតំបន់បី នៅចំណុចតំបន់សសរមួយ ស្ថិតនៅក្នុងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ នារសៀលថ្ងៃទី ១៥ ខែធ្នូ ឆ្នាំ២០២១។
នៅក្នុងយុទ្ធនាការដាំកូនឈើនេះផងដែរគឺឯកឧត្តម ងួន រតន: បានបញ្ជាក់ផងដែរថា ក្រោយពេលដែលសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានចេញនូវបទបញ្ជាដល់អភិបាលខេត្តជុំវិញបឹងទន្លេសាប សូមចាត់វិធានការទប់ស្កាត់បង្ក្រាបជាបន្ទាន់នូវរាល់សកម្មភាពដែលរំលោភបំពានរងការកាប់ទន្ទ្រានពីសំណាក់ឈ្មួញខិលខូច ដើម្បីយកដីតំបន់៣នេះ រៀបចំដាំកូនឈើឡើងវិញ ផ្ដល់ជាជម្រកត្រីពង និងជម្រកសត្វជាដើម។
ឯកឧត្តមបន្ថែមទៀតថា ការដាំកូនឈើនៅពេលនេះ គឺយើងដាំនៅលើដីដែលកាប់ទន្ទ្រានថ្មី ហើយចំពោះនៅតាមព្រំប្រទល់រវាងតំបន់២ និងតំបន់៣ គឺជាយើងមិនទាន់បានដាំនោះទេ យើងនៅរង់ចាំរហូតដល់ប្រជាពលរដ្ឋគាត់ប្រមូលផលស្រូវរួច ទើបយើងរៀបចំផែនការដាំកូនឈើនៅតាមព្រំប្រទល់តំបន់ ២ និងតំបន់ ៣ បន្តទៀត។
