កំពង់ចាម ៖ បើទោះបីជាជំងឺកូវីត១៩កំពុងរីករាលដាលយ៉ាងណាក៏ដោយ ក៏លោក ហុក និងឈ្មិះខ្លា ហា៑នបើកសង្វៀនជល់មាន់ និងអាប៉ោងយ៉ាងរំភើយ បានផ្គើនទៅនឹងប្រសាសន៍ថ្នាក់ដឹកនាំនិងក្រសួងសុខាភិបាល ជាពិសេសរាជរដ្ឋាភិបាល បានអំពាវនាវកុំឲ្យប្រជាពលរដ្ឋជួបជុំគ្នាច្រើន ដើម្បីបង្កាទប់ស្កាត់កូវីដ១៩កំពុងឆ្លងចូលសហគមន៍។
ជាមួយគ្នានោះទីតាំងបន់ល្បែងនេះស្ថិតចំណុចដីចម្ការស្វាយ ខាងក្រោយវត្តកងតាណឹង ប្រហែល២គីឡូម៉ែត្រ ក្នុងភូមិទី៥ ឃុំកងតាណឹង ស្រុកកងមាស ខេត្តកំពង់ចាម។
ប្រភពពីពលរដ្ឋបានឱ្យដឹងថា ម្ចាស់សង្វៀនជល់មាន់ឈ្មោះហុក និងឈ្មោះខ្លា បានទទួលភ្ញៀវទីជិតទីឆ្ងាយ ដោយបើកភ្នាល់មួយគូររាប់ពាន់ដុល្លារ រីឯអាប៉ោងមួយគ្រប់ៗវិញខ្ទង់ពាន់ដូចគ្នា។ ទោះបីជាគោលនយោបាយភូមិឃុំមានសុវត្ថិភាពទាំង៩ ចំណុចរបស់រាជរដ្ឋាភិបាលដែលបានដាក់ចេញឲ្យអនុវត្ដន៍ទូទាំងប្រទេសក្ដី តួយ៉ាងទីតាំងល្បែងសុីសងជល់មាន់ ខាងលើនេះមិនអនុវត្តតាមដែរ។ បែរជាបើកលេងជារៀងរាល់ថ្ងៃ ប្រមូលផ្ដុំមនុស្សយ៉ាងច្រើនកុះករហ៊ោកញ្ជៀវអើងកងពេញចម្ការស្វាយ។
ប្រភពដដែលបានបន្តទៀតថា ទីតាំងនេះគឺបើកដំណើរការតាំងពីថ្ងៃទី១០ ខែកញ្ញា ឆ្នាំ២០២១មកម្លេះ និងធានាសុវត្តិភាពជូនភ្ញៀវពេញលេញ នឹងគ្មានស្ទាក់ស្ទើបន្តិចសោះ ព្រោះឈ្មោះ ហុក និងឈ្មោះខ្លា បានរត់ការអស់ហើយ។ អ្វីដែលសំខាន់ទៀតនោះគេសង្ស័យថា បទល្មើសចោរកម្មក៏កើតឡើងដូចជាចោរឆក់ ចោរលួច ចោរប្លន់ គាស់ផ្ទះយកទ្រព្យសម្បតិរបស់បងប្អូនប្រជាពលរដ្ឋជាដើម គឺអាចកើតចេញពីល្បែងស៊ីសងទាំងនេះឯង។
ជុំវិញករណីខាងលើនេះ លោក ជា ជួន អធិការនគរបាលស្រុកកងមាស ភ្ញាក់ងារសារព័ត៌មានយើងមិនអាចសុំការបកស្រាយបានទេ ព្រោះចុចទូរស័ព្ទចូលគ្មានអ្នកទទួល។ ប៉ុន្តែលោកភោគ សាវុទ្ធ អភិបាលស្រុកកងមាស បានថ្លែងប្រាប់ដល់អ្នកសារព័ត៌មានយើង នៅរសៀលថ្ងៃទី១៥ខែកញ្ញា ឆ្នាំ២០២១យ៉ាងខ្លីថា ចាំចាត់ឲ្យលោកអធិការស្រុកចុះទៅបង្ក្រាប។
ចំពោះលោកឯម កុសល ស្នងការខេត្ដកំពង់ចាម បានប្រាប់សារព័ត៌មានយើងនៅរសៀលថ្ងៃទី១៥ ខែកញ្ញា ឆ្នាំ២០២១នេះតាមតេលេក្រាមយ៉ាងខ្លីថា អរគុណស្រុកចាត់ការ រីឯសំនួរថាតើមានវិធាការច្បាប់ទៅលើម្ចាស់សង្វៀនជល់មាន់ដែរឬទេ? លោកមិនឆ្លើយតបទេ៕
