កំពង់ឆ្នាំង ៖ នៅព្រឹកថ្ងៃទី១៣ ខែកញ្ញា ឆ្នាំ២០២១ ដែលស្ថិតនៅក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ កំលាំងចំរុះស្រុកបរិបូណ៍ បានចុះរុះរើតូបលក់ដូរអាណាធិបតេយ្យនៅតាមបណ្ដោយផ្លូវជាតិលេខ៥២ ដែលដឹកនាំដោយលោក ផល សុភាព ជាអភិបាលរង និងលោក សាំង គឹមស៊ន មេឃុំឆ្នុកទ្រូ។
សមាសភាពកម្លាំងចូលរួមមាន:
១. លោក ផល សុភាព អភិបាលរង ស្រុកបរិបូណ៌
២. លោក សាំង គឹមស៊ន មេឃុំ ឆ្នុកទ្រូ
៣. ប៉េអឹម B04
៤. បរិស្ថាន
៥. ពូលីស ចរាចរណ៍ជើងទឹក
ដោយមានការស្នើសុំពីមន្ទីរសាធារណៈការខេត្ត ដើម្បីឲ្យមានសោភ័ណភាពល្អ និងបញ្ចៀសការកកស្ទះនិងគ្រោះថ្នាក់ចរាចរណ៍ដោយយថាហេតុណាមួយកើតឡើង ទើបអាជ្ញាធរសម្រេចចុះរុះរើតូបលក់ដូរអនាធិបតេយ្យ នៅតាមបណ្ដោយផ្លូវជាតិលេខ 52ដាច់ខាតមិនឱ្យលក់ដូរបន្តទៀតទេ
តាមរយៈបងប្អូនអាជីវករដែលត្រូវរុះរើតូប បានបញ្ជាក់ឲ្យដឹងថា ពួកគាត់មិនចង់លក់ដូរនៅតាមចិញ្ចើមផ្លូវនោះទេ មូលហេតុដោយសារតែអាជ្ញាធរឃុំនិងស្រុក មិនព្រមដោះស្រាយនិងសម្របសម្រួល ជាមួយក្រុមហ៊ុនផ្សារសមុទ្រទឹកសាប ដើម្បីសម្រួលរៀបចំកន្លែងលក់ដូរជូនពួកគាត់ទេ
គាត់ពុំមានលទ្ធភាពចូលលក់ដូរនៅក្នុងផ្សារថ្មីដែលមានឈ្មោះថា ផ្សារសមុទ្រទឹកសាបនោះទេ ពីព្រោះក្រុមហ៊ុនផ្សារបានដាក់តម្លៃខ្ពស់ពេក ត្រូវតម្រូវឲ្យកក់លុយក្នុង០១តូបៗ ចំនួន១៥០០ដុល្លា(មួយពាន់ប្រាំរយដុល្លា)បង់ជាខែក្នុង០១តូបៗ២៥ដុល្លាទៅ៣៥ដុល្លា ហើយត្រូវធ្វើតូបខ្លួនឯងទៀត ហេតុនេះហើយបានជាពួកគាត់បង្ខំចិត្តលក់ដូរនៅតាមចិញ្ចើមផ្លូវ ដើម្បីដោះស្រាយបញ្ហាក្រពះនិងធនាគារ ជាក់ស្ដែងផ្សារថ្មីរបស់ក្រុមហ៊ុន ជាទីតាំងលក់ដូរចាស់របស់គាត់ដែរ។
តើត្រូវឲ្យពួកគាត់លក់ដូរនៅកន្លែងណា ខណៈដែលជំងឺកូវិដកំពុងតែរាលដាលនៅក្នុងសហគមន៍ ប្រាក់ចំណូលដែលធ្លាប់មានពីមុនមកត្រូវបាត់បង់អស់ហើយ ហើយត្រូវបាត់បង់ទីកន្លែងលក់ដូរទៀត តើត្រូវរស់ដោយរបៀបណាបើពឹងទៅលើដីស្រែក៏គ្មាន មានតែមុខរបរលក់ដូរបន្តិចបន្តួចដើម្បីចិញ្ចឹមក្រពះ ហេតុនេះហើយមានតែទទូចអង្វរស្នើសុំដោយក្ដីអនុគ្រោះ ពីឯកឧត្តមអភិបាលខេត្ត ស៊ុន សុវណ្ណារិទ្ធ មេត្តាជួយរកដំណោះស្រាយពួកគាត់ផង៕
