កំពង់ធំ៖ ខណះពេលដែលមិនទាន់ប្រកាសតែងតាំងនាយខណ្ទរដ្ឋបាលជលផលថ្មី ស្រាប់តែឈ្មួញបង្កើតបទល្មើសនេសាទឡើងពេញបន្ទុក ដែលត្រូវបានគេដឹងថា លោក ស៊ិន សុភី នាយសង្កាត់រដ្ឋបាលជលផលឃុំផាត់សណ្តាយ បានឃុបឃិតផ្សំគំនិតអោយក្រុមបំផ្លាញធនធានមច្ឆាជាតិពាសពេញផ្ទៃទឹក ។
ជាក់ស្តែងបទល្មើសនេសាទកើតមានយ៉ាងច្រើនស្អេកស្កេះ មានទាំង របាំងរាប់រយលុក សាច់សារ៉ូ សាច់ក្រហម សាច់ខៀវ អ៊ួនក្រឡាញឹក ពាសពេញផ្ទៃបឹងទន្លេសាប ក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ។
កក្តាទាំងនេះដែលត្រូវបានគេដឹងថា មន្ដ្រីជំនាញបានផ្សំគំនិតគ្នាអោយក្រុមនេសាទប្រើប្រាស់ឧបករណ៍ខុសច្បាប់រៀងរាល់ឆ្នាំ ដោយមានអ្នកចាំទិញត្រី ឈ្មោះ អ៊ី ជាប្រពន្ឋលោក ហេងមនោ មេឃុំផាត់សណ្តាយ ជាថៃកែធំ។
យោងតាមសេចក្តីរាយការណ៍ ពីប្រជានេសាទបានបញ្ជាក់ច្បាស់ៗថា បានបង់លុយជូននាយសង្កាត់ និង នាយផ្នែក ដែលជាថ្នូរទៅនិងការមិនបង្ក្រាប់បទល្មើសនេសាទ នៅចំណុច ជ្រោយវាលវែង មកដល់ ដងទង់ គឺមានឈ្មោះ កងស៊ី ជាអ្នកដាក់បទល្មើសខ្នាតធំជាងគេរាប់មិនអស់និងជាអ្នកប្រមូលលុយឲ្យសមត្ថកិច្ចជំនាញនិងស្ថាប័នទាំងក្នុងក្របខណ្ទនិងក្រៅក្របខណ្ទផងដែរ។
មិនតែប៉ុណ្ណោះលោកស៊ិន សុភី នាយសង្កាត់ បានអនុញ្ញាតឲ្យចែ អ៊ី ប្រពន្ឋលោកហេងមនោ មេឃុំផាត់សណ្តាយ ដាក់បទល្មើសជាង១០ទូកនៅចំនុច ក្រឡុកបាយក្អែក ចំណុច មាត់បាយចេស ឡើងមកខាងលិចរហូតដល់ទ្ធារបឹង គឺមានឈ្មោះសឺង ឈ្មោះលាន ឈ្មោះថា ឈ្មោះឃឿនលើ ឈ្មោះលាង ឈ្មោះស៊ង ឈ្មោះអ៊ូក ឈ្មោះហ៊ាង ឈ្មោះថាធា ឈ្មោះទី និងឈ្មោះឆេង ដាក់វែងជាងគេនៅចំណុចបាទាល់ បាកោង ។
សូមបញ្ជាក់ថា អ្នកប្រព្រឹត្តបទល្មើសនេសាទទាំងអស់ បានរួមគ្នាកសាងប្រព័ន្ឋសុវត្តិភាព ជាមួយជំនាញរដ្ឋបាលជលផល ទាំងផ្នែក ទាំងសង្កាត់ ដើម្បីរួមគ្នាបំផ្លាញធនធានមច្ឆាជាតិជារៀងរាល់ឆ្នាំ បានធ្វើអោយមច្ឆាជាតិទាំងតូចទាំងធំរលាយបាត់អស់បន្តិចម្ដងៗរាល់ឆ្នាំ សូម្បីតែឡូត៍អភិរក្សសម្រាប់ទុកពូជត្រីអោយពងកូនក៏គ្មានត្រីដែរ រហូតដល់ថ្នាក់ ប្រជាពលរដ្ឋយល់ថា ថៅកែឡូត៍នៅលើផ្ទៃបឹងទន្លេសាប បច្ចុប្បន្នគឺជាជំនាញជលផលហ្នឹងហើយ ។
ពាក់ព័ន្ធនិងការរឹះគន់នេះអង្គភាពយើងមិនទាន់បានសុំការបំភ្លឺជាមួយអ្នកជាប់ពាក់ព័ន្ធទាំងអស់នៅឡើយទេតែទោះយ៉ាងណាក៏អង្គភាពយើងនិងរងចាំការបំភ្លឺនេះគ្រប់ម៉ោងធ្វើការ៕ ព័ត៏មាន បឋម
