ខេត្តរតន:គីរី ៖ ប្រភពពីមន្ត្រីនៅច្រកទ្វារអន្តរជាតិអូរយ៉ាដាវ ស្រុកអូរយ៉ាដាវ ខេត្តរតនគិរី បានឲ្យដឹងថា បច្ចុប្បន្នលោក ខឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកអូរយ៉ាដាវ នៅតែបើកដៃឲ្យឈ្មួញដឹកជញ្ជូនឈើទៅស្រុកយួនយ៉ាងរលូន។ ជាក់ស្តែងកាលពីថ្ងៃទី២៤ ខែសីហា ឆ្នាំ២០២១ មានរថយន្តធុនធំដឹកផ្លែល្ពៅបង្កប់ឈើពីក្រោមឆ្លងផុតបារ៉ាស់ច្រកអូរយ៉ាដាវ ចូលទៅទឹកដីយួន ហើយត្រូវសមត្ថកិច្ចយួនបណ្តេញឲ្យចេញមកទឹកដីខ្មែរវិញ។ បញ្ហានេះបានបញ្ជាក់យ៉ាងច្បាស់នូវអំពើពុករលួយរបស់សមត្ថកិច្ចនៅច្រកទ្វារអន្តរេះជាតិអូរយ៉ាដាវ ហើយលោក ខឹម ចិត្រា ជាអ្នកទទួលខុសត្រូវធំជាងគេ។
ប្រភពស្និទ្ធនឹងលោក ខឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកអូរយ៉ាដាវ បានឲ្យដឹងថា កន្លងមកលោក ខឹម ចិត្រា តែងតែបើកបារ៉ាស់ឲ្យឈ្មួញដឹកជញ្ជូនឈើទៅស្រុកយួនតាមច្រកនេះយ៉ាងរលូន។ ចំណែកលោក ថង សាវុន អភិបាលខេត្តរតនគិរី ក៏ដូចជាលោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី និងលោក យិន ចំណាន ស្នងការនគរបាលខេត្តរតនគិរី មិនចាត់វិធានការទប់ស្កាត់ក្រុមឈ្មួញដឹកជញ្ជូនឈើទៅស្រុកយួនតាមច្រកអូរយ៉ាដាវ នោះទេ។ ជាងនេះទៅទៀតក្រុមឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់ពីស្រុកយួនតាមច្រកអូរយ៉ាដាវ ក៏ជាប្រភពចំណូលរបស់លោក ខឹម ចិត្រា ផងដែរ។
មន្ត្រីពាក់ព័ន្ធនៅច្រកទ្វារអន្តរជាតិអូរយ៉ាដាវ បានឲ្យដឹងថា ការដែលលោក ខឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកអូរយ៉ាដាវ ហ៊ានធ្វើអ្វីៗតាមអំពើចិត្តគឺដោយសារមានខ្នងបង្អែករឹងមាំនៅក្នុងអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ។
ប្រភពបានឲ្យដឹងទៀតថា ក្រោយពេលចាកចេញពីតំណែងជានាយប៉ុស្តិ៍នគរបាលអន្តោប្រវេសន៍ច្រកប៉ោយប៉ែត មកធ្វើជានាយប៉ុស្តិ៍នគរបាលអន្តោប្រវេសន៍ច្រកអូរយ៉ាដាវគឺលោក ខឹម ចិត្រា បើកបារ៉ាស់ឲ្យឈ្មួញដឹកជញ្ជូនឈើទៅស្រុកយួនយ៉ាងរលូន។ រីឯមន្ត្រីអាជ្ញាធរនិងសមត្ថកិច្ចក្នុងខេត្តរតនគិរី មិនហ៊ានប៉ះពាល់លោក ខឹម ចិត្រា នាយប៉ុស្តិ៍នគរបាលអន្តោប្រវេសន៍ច្រកអូរយ៉ាដាវ នោះទេព្រោះដឹងថា លោក ខឹម ចិត្រា មានបង្អែកដ៏រឹងមាំ៕
