សៀមរាប៖ ឈើខុសច្បាប់ជាច្រើនម៉ែត្រគូបដែលឈ្មួញយកមកលាក់ទុកនៅតាមផ្ទះប្រជាពលរដ្ឋ ត្រូវបានមន្ដ្រីជំនាញចុះបង្ក្រាបនៅព្រឹកថ្ងៃទី ២៥ ខែសីហាឆ្នាំ ២០២១ ក្នុងភូមិ អូរ ឃុំ ខ្វាវ ស្រុកជីក្រែង ខេត្ត សៀមរាប ក្រោមការបញ្ជាផ្ទាល់ពីលោក ស៊ុន គង់ ប្រធានមន្ទីរបរិស្ថាន។
លោក ស៊ុន គង់ ប្រធានមន្ទីរបរិស្ថានខេត្តសៀមរាប បានផ្ដល់បទសម្ភាសតាមទូស័ព្ទនៅរសៀលថ្ងៃទី២៦ ខែសីហា ឆ្នាំ២០២១ ថាឈើដែលត្រូវបានចាប់រួមមានឈើតាប់ប្រភេទឈើសុក្រំ ៣ម៉ែត្រគូប កន្លះ យកទៅរក្សាទុកនៅស្នាក់ការ បរិស្ថានដែនជម្រកសត្វព្រៃបឹងពែរ ភូមិសាស្ត្រខេត្តសៀមរាបរង់ចាំបន្តនីតិវិធីតាមផ្លូវច្បាប់។
អង្គភាពសារព័ត៌មានយើងបានcallទៅលោក គង់ សុធា ប្រធានស្នាក់ការដែនជម្រកសត្វព្រៃបឹងពែរដើម្បីសុំទូរលេខការវាស់វែងចំនួនឈើដែលត្រូវបានចាប់តែលោកថានៅក្នុងព្រៃមិនទាន់បានដឹង ចាំសួរទៅមន្ត្រីសិនចាំផ្ដល់ព័ត៌មានឲ្យតាមក្រោយ។
ប្រភពពីពលរដ្ឋមួយចំនួនលើកឡើងថាទឹកដីឃុំខ្វាវនៅតែមានឈ្មួញរកស៊ីដឹកជញ្ជូនផលអនុផលព្រៃឈើជាបន្តបន្ទាប់ ទោះបីមន្ត្រីថ្នាក់លើបញ្ជាឲ្យបង្ក្រាបហើយ បង្ក្រាបទៀត តែមន្ត្រីថ្នាក់ក្រោមមួយចំនួន ហាក់បីដូចជាអសកម្ម។
ពលរដ្ននិងមន្ដ្រីរាជការបានរឹះគន់ចំៗថា ក្នុងអណ្ណត្តលោក ពៅ ប៊ុនធឿន ជា អភិបាលស្រុកជីក្រែង និងលោក ពៅ ជុំ ជាប្រធានស្នារការបរិស្ថានស្រុកជីក្រែង ត្រូវបានគេសង្កេតឃើញថាដីព្រៃរបស់រដ្នជិតរលាយអស់ហើយ ដោយសារតែអស់លោកមិនយកចិត្តទុកដាក់ការពារព្រៃឈើអោយនានម៉ត់ចត់ ព្រោះបច្ចុប្បន្ន គេសង្កេតឃើញថាអ្នកមានលុយមានអំណាចបានឈូសឆាយកាប់ទន្ទ្រានដីព្រៃយកធ្វើជាកម្មសិទ្ធិ រួមទាំងហែកព្រៃតំបន់ជំរកសត្វព្រៃបឹងពេរទៀតផង។
ប្រជាពលរដ្ឋថ្លែងថា ល្មមដល់ពេលដោះដូរមន្ដ្រីរាជការខ្លះហើយ ក្រែងលរសល់ព្រៃ សល់ដីរដ្ឋខ្លះ៕
