សៀមរាប ៖ ដីសហគមព្រៃស្និប ឋិតក្នុងឃុំគោកធ្លកលើ ស្រុកជីក្រែង ខេត្តសៀមរាប កំពុងរងការឈូសឆាយយ៉ាងវិនាសហិនហោចពីសំណាក់ក្រុមឈ្មួញ និងក្រុមខិលខូច ចូលទៅឈួសឆាយទន្ទ្រាន ដើម្បីយកដីធ្វើជាកម្មសិទ្ធផ្ទាល់ខ្លួនដោយមានការសង្ស័យថាមានការឃុបឃិតពីអាជ្ញាធរ ភូមិ ឃុំ ស្រុក មួយចំនួន ដែលតម្រូវអោយថ្នាក់ខេត្ត ចុះបង្ក្រាប់និងទប់ស្កាត់អោយទាន់ពេលវេលា បើមិនដូច្នោះទេព្រៃឈើខាងលើមុខតែវិនាសក្នុងពេលឆាប់ៗនេះ។
ជាក់ស្ដែងកាលពីរសៀលថ្ងៃទី ២៨ ខែកក្កដា ឆ្នាំ២០២១កន្លងទៅ មានសេចក្តីរាយការណ៍ពីប្រជាពលរដ្ឋថា មានត្រាក់ទ័រពីរគ្រឿងបានចូលទៅឈួសឆាយដីព្រៃសហគមស្និប បន្ទាប់មកអ្នកសារព័ត៌មានបានខលទៅមន្ត្រីជំនាញពាក់ព័ន្ធក្នុងមូលដ្ឋានកើតហេតុដើម្បីសុំសហការចុះទប់ស្កាត់ឬបង្ក្រាបគ្រឿងចក្រទាំងនោះ តែពេលអ្នកសារព័ត៌មានទៅមិនទាន់ដល់ទីតាំងខាងលើផងស្រាប់តែឃើញត្រាក់ទ័រទាំងនោះបើករត់ចេញពីដីព្រៃសហគមន៍ស្និបយ៉ាងលឿនហាក់បីដូចជាដឹងខ្លួនមុន។
តាមការសង្កេតបានឲ្យឃើញថា មិនត្រឹមតែឈូសឆាយដីព្រៃសហគមន៍ព្រៃស្និបនោះទេ សូម្បីតែដីព្រៃគម្របព្រៃឈើឋិតនៅភូមិខ្វាវ ឃុំ ខ្វាវ ក៏ក្រុមឈ្មួញបាននាំគ្នាកាប់ទន្ទ្រាននិងឈួសឆាយយកធ្វើជាកម្មសិទ្ធផ្ទាល់ខ្លួនផងដែរ តែមិនដែលឃើញមន្ត្រីជំនាញបង្ក្រាបបានម្ដងនោះទេ រាល់ការរាយការណ៍របស់អ្នកសារព័ត៌មានទៅអាជ្ញាធរមានសមត្ថកិច្ចតែងតែធ្វើអោយក្រុមឈ្មួញបើករត់គេចខ្លួនបានមុនមន្ត្រីជំនាញទៅដល់ជានិច្ច។
សូមបញ្ជាក់ថាខណៈពេលអាត្រាក់ទ័រចំនួនពីរគ្រឿងកំពុងឈួសឆាយដីព្រៃសហគមន៍ស្និបនោះ អ្នកសារព័ត៌មានយើងបានទំនាក់ទំនងទៅលោកអធិការស្រុកជីក្រែងដើម្បីសុំកម្លាំងសហការឃាត់គ្រឿងចក្រទាំងនោះតែបន្ទាប់មកលោកអធិការប្រាប់ថាចាំឲ្យកម្លាំងក្រោមឱវាទចុះទៅមើលតែមិនទាន់ឃើញមានកម្លាំងសមត្ថកិច្ចចុះទៅដល់ទីតាំងកើតហេតុផងបែរជាលោកអធិការស្រុកជីក្រែងប្រាប់មកសារព័ត៌មានយើងវិញថា កូនចៅរបស់លោករាយការណ៍ថាមិនឃើញត្រាក់ទ័រឈួសឆាយដីព្រៃ ដូចសារព័ត៌មានរាយការណ៍នោះទេ ។
សូមបញ្ជាក់ថា កម្លាំងនគរបាលដែលរាយការណ៍ទៅលោកអធិការស្រុកជីក្រែង ថា មិនមានអាត្រាក់ទ័រឈួសឆាយនោះ គឺជាការកុហសថ្នាក់លើសុទ្ធសាធ ព្រោះសារព័ត៌មានរង់ចាំសមត្ថកិច្ចនៅទីតាំងកើតហេតុផ្ទាល់ គឺមិនឃើញមានសត្ថកិច្ចណាម្នាក់នោះទេ ដែលជាហេតុធ្វើឲ្យអាត្រាក់ទ័រទាំងពីរគ្រឿងដែលឈួសឆាយដីព្រៃសហគបន៍ស្និបជិះរត់គេចខ្លួនយ៉ាងរលូន ។
តើមន្ត្រីជំនាញក្នុងស្រុកជីក្រែង មានអ្វីពាក់ព័ន្ធជាមួយក្រុមឈ្មួញ ឬ ក្រុមខិលខូចដែលឈួសឆាយដីសហគមន៍ព្រៃស្និប ឃុំគោកធ្លកលើ និង ដីគម្របព្រៃឈើក្នុងភូមិខ្វាវ ឃុំខ្វាវ ទើបបង្ក្រាបមិនបានដោយក្រុមឈ្មួញតែងរត់គេចខ្លួនបានរហូតបែបនេះ? សូមលោក ពៅ ប៊ុនធឿន អភិបាលស្រុកជីក្រែង និង ឯកឧត្តម ទៀ សីហា អភិបាលនៃគណៈអភិបាលខេត្ត សៀមរាប លោក ស៊ុន គង់ ប្រធានបរិស្ថាន លោក ម៉ុង ប៊ុនលីម នាយខណ្ឌរដ្ឋព្រៃឈើខេត្តសៀមរាប មេត្តាស៊ើបអង្កេត និង ទប់ស្កាត់ករណីជាបន្ទាន់ផងចុះ បើពុំដូច្នេះទេ ព្រៃសហគមន៍ស្និប និង គម្របព្រៃឈើ ខ្វាវ ប្រាកជារលាយហិនហោចជាមិនខាន៕
