(ខេត្តកំពង់ធំ): នារសៀលថ្ងៃទី២៨ ខែកក្កដា ឆ្នាំ២០២១ ឯកឧត្តម សុខ លូ អភិបាលខេត្តកំពង់ធំ និងសហការី អញ្ជើញ ចុះ ពិនិត្យសាលាគរុកោសល្យ និងវិក្រិតការ ខេត្តកំពង់ធំ និងវិទ្យាស្ថានពហុបច្ចេកទេស ខេត្តកំពង់ធំ ដែលនឹងប្រែក្លាយ ទៅជាមណ្ឌល ចត្តាឡីស័ក និងជាមណ្ឌល សម្រាប់ព្យាបាលអ្នកជំងឺកូវីដ១៩ កម្រិតស្រាល បណ្ដោះអាសន្ន ។
នៅក្នុងឱកាសនោះឯកឧត្តម សុខ លូ បានគូសបញ្ជាក់ថាដោយសារស្ថានភាពជំងឺកូវីដ១៩ នៅតែបន្តរីករាលដាល ហើយ បងប្អូន ប្រជាពលរដ្ឋដែល កំពុងធ្វើចត្តាឡីស័ក មានការកើនឡើង ដូច្នេះក្នុងនាមអាជ្ញាធរខេត្ត គណៈកម្មការ ខេត្តប្រយុទ្ធនឹង ជំងឺ កូវីដ១៩ បន្តធ្វើការរៀបចំ បន្ថែមមណ្ឌលធ្វើចត្តាឡីស័ក និងជាមណ្ឌលព្យាបាលកម្រិតស្រាលផងដែរ ចំនួន ២កន្លែង បន្ថែម ទៀត ដើម្បីសម្របសម្រួលនៃការធ្វើចត្តាឡីស័ក និងជាកន្លែងព្យាបាលបងប្អូន ប្រជាពលរដ្ឋដែលមាន ការឆ្លងនូវជំងឺកូវីដ១៩ ឲ្យ បានត្រឹមត្រូវ ព្រមទាំងអំពាវនាវដល់បងប្អូនប្រជាពលរដ្ឋទាំងអស់សូម ចូលរួមអនុវត្ត ឲ្យបានខ្ជាប់ខ្ជួននូវវិធានការ ៣ការពារ ៣កុំ របស់រាជរដ្ឋាភិបាល និងគោរពតាមការណែ នាំរបស់ក្រសួងសុខាភិបាល។
ជាមួយគ្នានេះឯកឧត្តម សុខ លូ អភិបាលខេត្តកំពង់ធំ ក៏បានណែនាំក្រើនរំលឹកដល់ អាជ្ញាធរមូលដ្ឋាន និងក្រុមការងារ ទាំងអស់ ត្រូវខិតខំបន្តយកចិត្តទុក ដាក់ខ្ពស់ក្នុងការពិនិត្យ គ្រប់គ្រងបងប្អូនក្នុងមណ្ឌល ឲ្យបានល្អត្រឹមត្រូវដើម្បីចូលរួម ទប់ស្កាត់ ការរីករាលដាលនៃជំងឺកូវីដ១៩ ។
