កំពង់ធំ៖ កម្លាំងអាវុធហត្ថខេត្តកំពង់ធំ កាលព្រឹកថ្ងៃទី២៤ ខែឧសភា ឆ្នាំ២០២១នេះ បានឃាត់គ្រឿងចក្រ ០១គ្រឿងកំពុងធ្វើសកម្មភាពឈូសឆាយដីព្រៃលិចទឹក កាយប្រឡាយនៅចំណុចដែនជម្រកសត្វត្រី ដើម្បីធ្វើជាកម្មសិទ្ធិផ្ទាល់ខ្លួន។ ប្រតិបត្តិការណ៍នេះនៅចំណុចខាងលើបង្គោលកី ស្រុកស្ទោង ខេត្តកំពង់ធំ។
លោក វរះសេនីយ៌ឯក ឃុន ប៊ុនហូ មេបញ្ជាការរងកងរាជអាវុធហត្ថខេត្តខេត្តកំពង់ធំ បានប្រាប់អោយដឹងថា «គ្រឿងចក្រម ០១គ្រឿងបំផ្លាញព្រៃលិចទឹកដែលជាដែនជម្រកត្រីពងកូននោះ យើងមិនទាន់ដឹងថាវាខុសច្បាប់ឬយ៉ាងណា ចាំមើលមន្ត្រីជំនាញជលផលដើម្បីចុះទៅពិនិត្យមើលជាក់ស្ដែងសិន ។
លោក ប៉ែន វណ្ណារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំបានប្រាប់ ថាបញ្ហាខាងលើនេះរូបលោកបានបានទទួលព័ត៌មានហើយ។ លោកថា «ព័ត៌មានលម្អិតយើងមិនទាន់ច្បាស់ឡើយថា តើគ្រឿងចក្រខាងលើនេះមានច្បាប់ឬយ៉ាងណាទេ?! បើគ្រឿងចក្រខាងលើនេះគ្មានច្បាប់ទេ អនុញ្ញាតទេ យើងចាត់ការតាមនីតិវិធីច្បាប់ជាធរមាន។
ចំពោះម្ចាស់គ្រឿងចក្រឈ្មោះ មួយ វឿន នៅភូមិរំចេក ឃុំសំព្រោជ ស្រុកស្ទោង ត្រូវបានកម្លាំងអាវុធហត្ថខេត្តកំពង់ធំឃាត់គ្រឿងចក្របាន១គ្រឿង ចំណែក១គ្រឿងទៀតត្រូវបានបើករត់គេចបាត់ស្រមោល៕
