សៀមរាប ៖ លោក ទៀ សីហា ប្រធានគណៈបញ្ជាការឯកភាពរដ្ឋបាលខេត្តសៀមរាបនៅយប់ថ្ងៃទី១៨ ខែឧសភា ឆ្នាំ២០២១ បានអញ្ជើញចុះមកពិនិត្យស្ថានភាពភ្លើងកំពុងឆេះព្រៃលិចទឹកនៅតំបន់បឹងពារាំង ក្នុងសង្កាត់ជ្រាវ ក្រុងសៀមរាប ខេត្តសៀមរាប ក្នុងសកម្មភាពនោះបាន ប្រើប្រាស់ឡានបាញ់ទឹកជាច្រើនគ្រឿងដើម្បីបាញ់ពន្លត់តែមិនទាន់រលត់នៅឡើយ ។
ព្រៃលិចទឹកដែលជាជម្រកត្រីពងកូនបន្ដពូជនិងជាតំបន់អភិរក្សសត្វស្លាបគ្រប់ប្រភេទ ហើយក៏ជាតំបន់ទេសចរណ៍ជាប់បឹងទន្លេសាប មានទំហំជាង១០០ហិចតាត្រូវបានភ្លើងឆេះអស់ ក្នុងតំបន់នេះគឺជាការមើលថែរនិងអភិរក្សដោយសហគមន៍បឹងពារាំងដែលមានលោក គង់ មង្គល់ជាប្រធាន។
យោងតាមសំដីប្រជាពលរដ្ឋនិងមន្ត្រីសហគមន៍បានឲ្យដឹងថា ព្រៃសហគមន៍នេះឆេះរយះពេល៤យប់មកហើយ ដោយគេសនិដ្ឋានថាមានមនុស្សលួចដុត ការឆេះនេះកាលពីម៉ោង៩ព្រឹកថ្ងៃទី១៤ខែ ឧសភាឆ្នាំ២០២១រហូតមកដល់ថ្ងៃទី១៨ ខែឧសភា ឆ្នាំ២០២១។
លោក ទៀ សីហា ប្រធានគណះបញ្ជាការឯកភាពរដ្ឋបាលខេត្តសៀមរាប បានចុះទៅពិនិត្យដល់កន្លែងកើតហេតុ រួមទាំងមានវត្តមាន លោក ឧកញ៉ា សៀង ណាំ តំណាងរាស្ត្រមណ្ឌលខេត្តសៀមរាប បានបញ្ជូនឡានទឹកជាច្រើនគ្រឿងមកពន្លត់ឆ្លើងឆេះព្រៃនេះប៉ុន្តែមិនទាន់សង្គ្រោះបានទាំងស្រុងនោះទេ ព្រោះភ្លើងបានឆេះរីករាលដាលធំពេក និងផ្លូវចូលទៅពន្លត់ក៏ពិបាក ហើយពេលនេះកំពុងតែធ្វើការបាញ់ស្ទាក់កាត់មុខផ្លូវភ្លើងកុំឲ្យមានការឆេះរីកកាន់តែធំ ។
ក្នុងនោះដែរលោក ទៀសីហា ក៏បានដាក់បទបញ្ជាដល់គណៈបញ្ជាការឯកភាពរដ្ឋបាលក្រុង និង មន្ទីរពាក់ព័ន្ធធ្វើការស៊ីបអង្កេត ស្រាវជ្រាវជាបន្ទាន់ ដើម្បីវែកមុខរកជនបង្ក ក្នុងការបំផ្លិចបំផ្លាញសម្បត្តិធម្មជាតិ យកមកធ្វើការផ្តន្ទាទោសទៅតាមផ្លូវច្បាប់ ។
បងប្អូនប្រជាពលរដ្ឋមានការសោកស្តាយយ៉ាងខ្លាំង ចំពោះព្រៃអភិរក្សដ៏សំខាន់នេះ ព្រោះថាទំរាំព្រៃនេះបានដុះដូចដើមមកវិញ មានរយៈពេល១០ទៅ២០ឆ្នាំទៀតបានអាចដូចដើមវិញ ។
សូមរំលឹកផលដែរថា កាលពីរដូវប្រាំងឆ្នាំមុនក៏មានការឆេះព្រៃសម្រាប់ត្រីពងកូន តំបន់បឹងពារាំងនេះផងដែរ គ្រាន់តែមានទំហំនៃការឆេះតូចជាងនេះ ៕
