ខេត្តកំពង់ធំ ៖ ឯកឧត្តម សុខ លូ អភិបាលខេត្តកំពង់ធំ នាព្រឹកថ្ងៃទី០៩ ខែឧសភា ឆ្នាំ២០២១ បានអញ្ជើញចុះ ពិនិត្យ ការបាញ់ថ្នាំសំលាប់មេរោគនៅផ្សារស្ទោង មុននឹងការបើកដំណើរការលក់ដូរឡើងវិញនៅថ្ងៃស្អែក និង បន្ត បាញ់ ថ្នាំតាមផ្ទះមួយចំនួននៅភូមិលាបទង ឃុំកំពង់ចិនត្បូង ស្រុកស្ទោងខេត្តកំពង់ធំ ដើម្បីការពារ ទប់ស្កាត់ ការ រីករាលដាលជម្ងឺកូវីដ-១៩។
ថ្លែងនៅក្នុងដំណើរការចុះត្រួតពិនិត្យនោះដែរ ឯកឧត្តម សុខ លូ អភិបាលខេត្តកំពង់ធំ មានប្រសាសន៍ លើក ឡើងថា បន្ទាប់ពីមានការឆ្លងរីករាលដាលជំងឺកូវីដ១៩ នៅក្នុងភូមិលាបទង ឃុំកំពង់ចិនត្បូង ស្រុកស្ទោង កាលពីថ្ងៃទី២៨ ខែមេសាកន្លងមក រដ្ឋបាលខេត្តកំពង់ធំបានសម្រេចបិទទីតាំងដែលមានការផ្ទុះនូវជំងឺកូវីដ១៩ នេះជាបណ្ដោះអាសន្ន ដោយបានបង្កើតគណៈកម្មកាភ្លាមៗ ដើម្បីគ្រប់គ្រងស្ថានការណ៍នៅតំបន់នេះដោយ ហ្មត់ចត់ បំផុត ហើយក្រុមការបានប្រមូលបងប្អូនប្រជាពលរដ្ឋដែលមានការពាក់ព័ន្ធផ្ទាល់ និងប្រយោល ជាមួយ នឹងអ្នកវិជ្ជមានជំងឺកូវីដ១៩ យកមកដាក់នៅមណ្ឌលចត្តាឡីស័ក និងយកសំណាកដើម្បីវិភាគរកជំងឺកូវីដ១៩ ជា បន្ត បន្ទាប់ ហើយរហូតមកដល់ពេលនេះស្ថានការណ៍នៅក្នុងស្រុកស្ទោងគឺយើងអាចគ្រប់គ្រងបាន។
ជាមួយគ្នានោះដែរឯកឧត្តម សុខ លូ ក៏បានថ្លែងអំណរគុណ និងកោតសរសើរ ចំពោះអាជ្ញាធរមូលដ្ឋាន កង កម្លាំង ចម្រុះ ក្រុមគ្រូពេទ្យ បុគ្គលិកសុខាភិបាល និងក្រុមការងារទាំងអស់ ដែលបានខិតខំកំពុងបំពេញ បេសកកម្ម ទាំងយប់ទាំងថ្ងៃ ហើយគ្មានពេលសម្រាកគ្រប់គ្រាន់នោះឡើយ ដើម្បីក្តីសុខរបស់ប្រជា ពលរដ្ឋ យើង។
ទន្ទឹមនឹងនោះ ឯកឧត្តម សុខ លូ ក៏បានអំពាវនាវដល់បងប្អូនអាជីវករ និងប្រជាពលរដ្ឋទាំងអស់ បន្ទាប់ពីបើក ដំណើរ ការផ្សារស្ទោងឱ្យលក់ដូរឡើងវិញ សូមរក្សាគម្លាតសុវត្ថិភាព ជាពិសេសត្រូវគោរពតាមវិធានការ ៣ការពារ និង៣កុំ របស់រាជរដ្ឋាភិបាល និងអនុវត្តតាមសេចក្តីណែនាំរបស់ក្រសួងសុខាភិបាល អនុវត្តឲ្យ បាន ខ្ជាប់ខ្ជួនដែលជាវិធានការមួយដ៏មានប្រសិទ្ធភាពបំផុតនៅក្នុងសម័យកូវីដ១៩នេះ។
ជាមួយគ្នានោះដែរ ប្រជាពលរដ្ឋនៅក្នុងស្រុកស្ទោងបានគាំទ្រនូវចំណាត់ការរបស់ថ្នាក់ដឹកនាំខេត្តកំពង់ធំ ក្រោម ការ ចង្អុលបង្ហាញរបស់ប្រមុខរាជរដ្ឋាភិបាលកម្ពុជា ក្នុងការគ្រប់គ្រងស្ថានការណ៍នៃការឆ្លងរីករាលដាល ជំងឺ កូវីដ១៩ នៅក្នុងស្រុកស្ទោងនេះបានឆាប់រហ័សនិងទាន់ពេលវេលា។
