សៀមរាប ៖ គ្លីនិច៧៧៧ និង គ្លីនិកសុខភាព ស្ថិតនៅសង្កាត់ស្វាយដង្គំ និងបន្ទប់ពិគ្រោះជម្ងឺ ២កន្លែងនៅក្នុងសង្កាត់គោកចក ក្រុងសៀមរាប ដែលមានការពាក់ព័ន្ធអ្នកជម្ងឺ ឈ្មោះ ម៉ាប់ វ៉ុន អាយុ ៣៥ឆ្នាំ មានមុខរបរជាបើរថយន្តដឹកដីឲ្យក្រុមហ៊ុនចិនធ្វើផ្លូវ នៅស្រុកកណ្តាលស្ទឹង និងរយៈប្រហែល០២ខែក្រោយនេះ ធ្វើការជាអ្នកបើករថយន្តដឹកដីឲ្យក្រុមហ៊ុនចិន (ក្រុមហ៊ុនដដែល) ធ្វើផ្លូវនៅភូមិ ដីឥដ្ឋ ស្រុកកៀនស្វាយ ខេត្តកណ្តាល ដែលមានអាសយដ្ឋាន ភូមិគោកត្នោត សង្កាត់គោកចក ក្រុង ខេត្តសៀមរាប ត្រូវបានបិទជា បណ្តោះអាសន្ន ។
តាមការបញ្ជាក់របស់ក្រុមគ្រូពេទ្យ ប្រយុទ្ធប្រឆាំងជម្ងឺកូវិដ១៩ខេត្ត បានឲ្យដឹងនៅថ្ងៃទី២០ ខែមីនា ឆ្នាំ២០២១ ពីសាវតា អ្នកជម្ងឺឈ្មោះ ម៉ាប់ វ៉ុន ក្រោយពេលដែលចូលសម្រាកព្យាបាលនៅមន្ទីរពេទ្យបង្អែកខេត្តសៀមរាប និង បានយកសំណាកពិនិត្យ នៅមន្ទីរពិសោធន៍មន្ទីរពេទ្យខេត្តសៀមរាប បានរកឃើញវិញមានកូវិដ១៩ ។ ក្នុងការតាមដានសួរនាំពីអ្នកជម្ងឺ បានបញ្ជាក់ថា នៅថ្ងៃទី០៨ ខែមីនា បុរសរូបនេះបានធ្វើដំណើរពីក្រុងភ្នំពេញ តាមរថយន្តក្រុមហ៊ុន ឡាវីតា នៅម៉ោង១៩ ដែលមានគ្នា០៤នាក់នឹងអ្នកបើកបរ ។ នៅថ្ងៃទី១៣ មីនា បរុសរូបនេះ មានអាការះរោគសញ្ញាឈឺក្បាលក្តៅខ្លួន បានទៅពិនិត្យឈាមនៅ ពេទ្យចាន់ ផ្សារភូមិភាគ តែបាន២ថ្ងៃមិនបានធូរស្បើយ នៅថ្ងៃទី១៥ មីនាបានទៅពិនិត្យនៅពេទ្យ តូច កូ ផ្សារដើមក្រឡាញ់ ព្រមទាំងដាក់សេរ៉ូម ចំនួន២ព្រឹក លុះនៅថ្ងៃទី១៧ មីនា ក៏បានចូលមកសម្រាកព្យាបាល នៅគ្លីនិក ៧៧៧ រយៈពេល៣យប់ នូវគ្រែលេខ៤ និង នៅថ្ងៃទី១៩ មីនា ក៏បានទៅ ថតសួតនៅ គ្លីនិចសុខភាព ទើបនៅថ្ងៃទី២០ មីនា បានចូលទៅសម្រាកព្យាបាលនៅមន្ទីរពេទ្យបង្អែកខេត្ត ទើបពិនិត្យ មានចេញរោគសញ្ញារលាកសួត ។
នៅវេលាល្ងាចថ្ងៃទី២០ មីនា ឆ្នាំ២០២១នេះ គណៈកម្មការប្រយុទ្ធប្រឆាំងបង្កាទប់ស្កាត់ជម្ងឺកូវីដ១៩ បានសហការជាមួយសមត្ថកិច្ចមូលដ្ឋានសង្កាត់ស្វាយដង្គំ និង សង្កាត់គោកចក ក្រុងសៀមរាប បានចុះទៅបិទជាបណ្តោះអាសន្ននៅគ្លីនិច៧៧៧ និងគ្លីនិក សុខភាព ស្ថិតនៅសង្កាត់ស្វាយដង្គំ និងកន្លែងពិគ្រោះជម្ងឺ ២កន្លែងនៅក្នុងសង្កាត់គោកចក ដែលគេសង្ស័យថា បានប៉ះពាល់ជាមួយអ្នកវិជ្ជមានមេរោគកូវីដ១៩ បានធ្វើដំណើរមកពីខេត្តកណ្តាល ចូលមកខេត្តសៀមរាប ។
តាមការបញ្ជាក់របស់លោកប្រធានមន្ទីរពេទ្យបង្អែកខេត្តសៀមរាប បានឲ្យដឹងថា ក្នុងករណីនេះ គណៈកម្មការប្រយុទ្ធប្រឆាំងបង្កាទប់ស្កាត់ជម្ងឺកូវីដ១៩ ត្រូវធ្វើការបិទជាបណ្តាះអាសន្ន ដើម្បីធ្វើការគ្រប់គ្រងកុំឲ្យមានការរីករាលដាលជាសហគមន៍ ពិសេសបងប្អូនអ្នកជម្ងឺ ក្រុមគ្រូពេទ្យនៅក្នុងគ្លីនិកទាំងពីរ និង បន្ទប់ពិគ្រោះជម្ងឺទាំងពីរ ដោយដាក់ឲ្យធ្វើចត្តាឡីស័កនៅនឹងកន្លែង និង ចំពោះអ្នកមានការពាក់ព័ន្ធ គឺត្រូវយកទៅដាក់នៅមណ្ឌលចត្តាឡីស័ក នៅសាលាបឋមសិក្សាអនុវត្តគរុកោសល្យខេត្ត ។
ក្រោយពេលករណីនេះ ផ្ទុះឡើងរដ្ឋបាលខេត្តសៀមរាប បានចេញលិខិតសម្រេចបិទជាបណ្តោះអាសន្ន គ្លីនិកទាំងពីរ ក្នុងសង្កាត់ស្វាយដង្គំ និង បន្ទប់ពិគ្រោះជម្ងឺពីរកន្លែង ក្នុងសង្កាត់គោកចក ក្រុងសៀមរាបផងដែរ ។ រដ្ឋបាលខេត្តសៀមរាបក៏បានអំពាវនាវដល់ប្រជាពលរដ្ឋដែលបានជួបប្រាស្រ័យទាក់ទងនឹងបុគ្គលដូចបាន ជម្រាបជូនខាងលើ ឬមានករណីសង្ស័យ ឬបានធ្វើដំណើរទៅកាន់ទីណា សូមរួសរាន់មកយកសំណាក នៅមណ្ឌលចត្តាឡីស័កសាលាគរុកោសល្យ និងអ្នករស់នៅក្បែរមន្ទីរពេទ្យ៧៧៧ សូមយកសំណាកនៅមន្ទីរពេទ្យ៧៧៧ ចាប់ពីថ្ងៃជូនដំណឹងនេះតទៅ ។ ក្នុងករណីនេះដែរម្ចាស់គ្លីនិក ៧៧៧ ក៏ជាគ្រូពេទ្យនៅកុមារអង្គរ ដែលធ្វើឲ្យមានការព្រួយបារម្ភផងដែរ ។
សូមបញ្ជាក់ថា មកដល់ពេលនេះយើងក៏មិនទាន់ទទួលរបាយការណ៍ ពីគណៈកម្មការប្រយុទ្ធប្រឆាំងបង្កាទប់ស្កាត់ជម្ងឺកូវីដ ១៩ ចំពោះក្រុមគ្រួពេទ្យ អ្នកជម្ងឺ និង ក្រុមគ្រួសារអ្នកពាក់ព័ន្ធមានប៉ុន្មាននាក់ដែលត្រូវធ្វើចត្តាឡីស័កនៅឡើយទេ ។
