(សៀមរាប)៖ មានករណី អគ្គិភ័យ មួយកើតឡើង បណ្តាលឲ្យឆេះផ្ទះប្រជាពលរដ្ឋមួយកន្លែង ដែលមានម្ចាស់ផ្ទះឈ្មោះ លឹម ញុឹប ភេទប្រុស អាយុ ៦២ឆ្នាំ ស្ថិតនៅចំណុច ភូមិបុស្ស ឃុំដំដែក ស្រុកសូទ្រនិគម ខេត្តសៀមរាប នៅថ្ងៃទី ២៥ ខែកុម្ភៈ ឆ្នាំ២០២៦ វេលាម៉ោង ១១:៣០នាទីព្រឹក ។
តាមរបាយការណ៍ ករណីអគ្គិភ័យនេះ បណ្តាលឲ្យខូចខាតផ្ទះចំនួន ១ខ្នង ប្រមាណ ៤០% មានទំហំ ០៦ម៉ែត្រ × ១២ម៉ែត្រ លក្ខណៈសំណង់ ថ្មក្រោម ឈើលើ ដំបូលប្រក់ក្បឿង និងខូចខាតសម្ភារៈប្រើប្រាស់មួយចំនួន។ មូលហេតុបឋម ត្រូវបានបញ្ជាក់ថា បណ្តាលមកពី ឆ្លងចរន្តអគ្គិសនី ទើបបង្កឲ្យកើតមានអគ្គិភ័យឆាបឆេះតែម្តង។
ក្រោយទទួលបានព័ត៌មានភ្លាមៗ លោកវរសេនីយ៍ឯក ឃីម ផល្លា អធិការនគរបាលស្រុកសូទ្រនិគម បានចាត់ចែងកម្លាំង និងរថយន្តពន្លត់អគ្គិភ័យ ចុះជួយអន្តរាគមន៍ទាន់ពេលវេលា ព្រមទាំងបានគោរពសុំគោលការណ៍ពីលោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប ដើម្បីស្នើសុំកិច្ចសហការពីអធិការដ្ឋាននគរបាលស្រុក ប្រាសាទបាគង និងអធិការដ្ឋាននគរបាលស្រុក ជីក្រែង។
សរុបរថយន្តពន្លត់អគ្គិភ័យដែលបានប្រើប្រាស់ មានចំនួន ០៣គ្រឿង និងប្រើប្រាស់ទឹកអស់សរុបចំនួន ០៤រថយន្ត ស្មើនឹង ២៤,០០០លីត្រ ទើបអាចគ្រប់គ្រងស្ថានការណ៍ និងពន្លត់អគ្គិភ័យឲ្យរលត់បានទាំងស្រុង នៅវេលាម៉ោង ១២:៣០នាទីថ្ងៃត្រង់ នាថ្ងៃខែឆ្នាំដដែល។
គួរបញ្ជាក់ថា ប្រតិបត្តិការពន្លត់អគ្គិភ័យនេះ ក៏មានការចូលរួមពី បងប្អូនប្រជាពលរដ្ឋ កម្លាំងប្រជាការពារ និងកម្លាំងកងរាជអាវុធហត្ថស្រុកសូទ្រនិគម ផងដែរ៕
