កំពង់ធំ៖ នៅថ្ងៃទី ២៧ ខែមករា ឆ្នាំ២០២៦ លោក សាយ គឹមឡម អភិបាលស្រុកស្ទោង បានជំរុញ និងណែនាំដល់អាជ្ញាធរឃុំ កំពង់ចិនត្បូង ត្រូវយកចិត្តទុកដាក់ខ្ពស់ក្នុងការរៀបចំ ប្រព័ន្ធលូបង្ហូរទឹកអមសងខាងផ្លូវបេតុងថ្មី ដើម្បីធានាបាននូវ សោភ័ណភាព សុវត្ថិភាព និង គុណភាពផ្លូវឲ្យនៅបានយូរអង្វែង ព្រមទាំងអាចបញ្ចៀសបញ្ហា កកស្ទះទឹក និងការខូចខាតផ្លូវនៅរដូវវស្សា។
លោកអភិបាលស្រុកបានលើកឡើងថា ការមានផ្លូវបេតុងល្អ ត្រូវដំណើរការជាមួយប្រព័ន្ធបង្ហូរទឹកឲ្យបានត្រឹមត្រូវ ព្រោះបើគ្មានលូ/ប្រព័ន្ធបង្ហូរទឹកគ្រប់គ្រាន់ នឹងអាចបង្កឲ្យទឹកឈរលើផ្លូវ ឬច្រោះច្រាំងផ្លូវ បណ្តាលឲ្យផ្លូវខូច ងាយប្រេះបែក និងប៉ះពាល់ដល់សុវត្ថិភាពអ្នកធ្វើដំណើរ។
ជាមួយគ្នានេះ លោកបានអំពាវនាវឲ្យអាជ្ញាធរមូលដ្ឋាន និងប្រជាពលរដ្ឋចូលរួមសហការក្នុងការថែរក្សាប្រព័ន្ធលូ បង្ហូរទឹកឲ្យបានស្អាត កុំបោះសំរាមចូលលូ និងចូលរួមសម្អាតជាប្រចាំ ដើម្បីឲ្យលូបង្ហូរទឹកដំណើរការបានល្អ និងបង្កើនភាពស្អាតស្អំជុំវិញខ្សែផ្លូវ។
