មានប្រសាសន៍ក្នុងបណ្តាញសង្គម ពាក់ព័ន្ធនឹងសកម្មភាពជ្រុលនិយមរបស់ក្រុមលោក K01 ដោយសម្តេចតេជោ ហ៊ុន សែន បានចាត់ទុកថា ជាអំពើដែលទៅហួសពីស្នេហាជាតិ និងជាបែបផែនរបស់ក្រុមនិយមជ្រុលហួសហេតុ ដែលសម្តេចសូមអោយបញ្ឈប់ជាបន្ទាន់ ហើយបែរមកចូលរួមពង្រឹងតម្លៃសីលធម៌ សុជីវធម៌ គុណធម៌ និងភាពថ្លៃថ្នូររបស់ជាតិ ។
សម្តេចបានមានប្រសាសន៍ទាំងស្រុងដូចនេះថា ៖ ខ្ញុំទើបបានមើលវីដេអូដែលមានរយៈពេលជាង ៨ នាទី របស់ក្រុមដែលដឹកនាំដោយលោក KO1 ទាក់ទងដល់ការធ្វើពហិការឈប់ប្រើប្រាស់ទំនិញថៃ ។
ខ្ញុំពិតជាមានការខកចិត្តចំពោះអំពើមិនគប្បីរបស់បងប្អូនទាំងនេះ ពិសេសសម្រាប់លោក KO1 តែម្ដង។
ការដុតចោលទំនិញថៃ និងការដាក់បណ្ដាសាចំពោះអ្នកលក់ទំនិញថៃដែលនៅសេសសល់លក់មិនទាន់អស់ គឺជាអំពើដែលទៅហួសពីស្នេហាជាតិ និងជាបែបផែនរបស់ក្រុមនិយមជ្រុលហួសហេតុ។
ប្រជាជនកម្ពុជាច្រើនណាស់ដែលធ្វើពហិការមិនប្រើប្រាស់ទំនិញថៃ មានស្ទើរតែ ៩៩ ភាគរយទៅហើយ មិនថាប្រជាជននៅក្នុងប្រទេស ឬបងប្អូនខ្មែរនៅក្រៅប្រទេសនោះទេ។
ចំណោទបញ្ហាស្ថិតនៅត្រង់អាជីវករលក់ដូរដែលមានទំនិញថៃនៅសល់ តើឲ្យពួកគាត់យកទៅណា? ដុតបំផ្លាញចោល ឬបន្តលក់ដើម្បីប្រមូលដើមទុនមកវិញ?
ប្រសិនបើ KO1 មានប្រាក់ សូមយកទៅទិញទំនិញដែលនៅសេសសល់ទាំងនេះ ធ្វើជាចំណីសត្វប្រសើរជាងដុតចោល ដូច KO1 បានធ្វើដែលមានក្នុងវីដេអូនេះ។ បើមនុស្សមិនទទួលទាន ទុកឲ្យសត្វស៊ីប្រសើរជាងដុត ឬកម្ទេចចោល។
ខ្ញុំសូមឲ្យ KO1 បញ្ឈប់សកម្មភាពបែបឆ្កួតៗនេះជាបន្ទាន់ និងចូលរួមពង្រឹងតម្លៃសីលធម៌ សុជីវធម៌ គុណធម៌ និងភាពថ្លៃថ្នូររបស់ជាតិ។
ខ្ញុំសរសេរបន្ថែមបន្ទាប់ពីបានអានខមិន
ខ្ញុំគាំទ្រការលក់ទំនិញចាស់ឲ្យអស់ តែមិនត្រូវនាំចូលទំនិញថ្មីមកបន្ថែមទៀតទេ។ សូមកុំឲ្យមានឈ្មោះថា ទំនិញចាស់លក់មិនចេះអស់ តែវាជាទំនិញនាំចូលថ្មីមកបោកអតិថិជន។
ឯអ្នកទិញក៏គួរពិនិត្យមើលតើជាទំនិញចាស់ ឬទំនិញថ្មី? ព្រោះទំនិញមានកាលកំណត់របស់វា។
ត្រូវខិតខំផលិតទំនិញក្នុងស្រុក និងជួយទិញផលិតផលក្នុងស្រុក ដើម្បីជំរុញកំណើនសេដ្ឋកិច្ចរបស់កម្ពុជា។ KO1 សូមចូលរួមយុទ្ធនាការជំរុញការប្រើប្រាស់ទំនិញក្នុងស្រុកវិញប្រសើរជាង។
