(រដ្ឋបាលខេត្តកំពង់ធំ)៖ នៅរសៀលថ្ងៃទី៣ ខែតុលា ឆ្នាំ២០២៥ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានអញ្ជើញចុះជួបសំណេះសំណាលសាកសួរសុខទុក្ខបងប្អូនពលករខ្មែរ ដែលត្រលប់មកពីប្រទេសថៃ នៅក្នុងខេត្តកំពង់ធំ។
ពិធីនេះក៏មានការអញ្ជើញចូលរួមពី ដោយមានការអញ្ជើញចូលរួមពីសំណាក់ឯកឧត្តមទេសរដ្ឋមន្ត្រី ថោង ខុន, ឯកឧត្ដមរដ្ឋមន្ត្រី ហួត ហាក់, លោកជំទាវ កុយ ពិសី, ឯកឧត្តម នួន ផារ័ត្ន អភិបាលខេត្តកំពង់ធំ ព្រមទាំងក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំជាច្រើនរូប។
ឯកឧត្តម នួន ផារ័ត្ន បានឡើងរាយការណ៍សង្ខេបលើកឡើងថា គិតត្រឹមថ្ងៃទី៣០ ខែកញ្ញា ឆ្នាំ២០២៥ នេះ សម្រាប់ខេត្តកំពង់ធំ ពលករដែលបានត្រឡប់មកពីប្រទេសថៃមានចំនួន១៣ ៦៥០នាក់ ក្នុងនោះពលករចំនួន៧ ២៨៦នាក់ បានទទួលការងារថ្មីនៅកម្ពុជា ។
ក្នុងឱកាសនោះដែរ ឯកឧត្ដម វង្សី វិស្សុត បានគូសរំលេចអំពីវិធានការសំខាន់ៗរបស់រាជរដ្ឋាភិបាលក្នុងការជួយសម្រួលដល់បងប្អូនប្រជាពលករដែលវិលត្រឡប់ពីប្រទេសថៃ រួមមានការសម្របសម្រួលនិងដឹកជញ្ជូនបងប្អូនត្រឡប់មកស្រុកកំណើតវិញ, ការបើកយុទ្ធនាការចុះឈ្មោះស្វែងរកការងារធ្វើ ឬចុះឈ្មោះរៀនជំនាញ, ការដាក់ឱ្យដំណើរការប្រព័ន្ធ Hotline ១២៩៧ ៧ថ្ងៃ/សប្តាហ៍ ដើម្បីផ្គូផ្គងព័ត៌មានទៅរោងចក្រ និងក្រុមហ៊ុនដែលត្រូវការកម្លាំងពលកម្ម និងការដាក់ឱ្យដំណើរការប្រព័ន្ធចុះឈ្មោះស្វែងរកការងារធ្វើតាមប្រព័ន្ធតេលេក្រាម, ការអនុគ្រោះដល់ជនភៀសសឹកនិងពលករ ដោយលើកលែងរាល់កម្រៃនិងការផាកពិន័យពាក់ព័ន្ធនឹងឥណទាន, ការកំណត់យកសាខាបេឡាជាតិសន្តិសុខសង្គម និងវិទ្យាស្ថានបណ្ដុះបណ្ដាល នៅតាមរាជធានី ខេត្ត ជាទីតាំងដែលប្រជាពលករអាចទៅចុះឈ្មោះស្វែងរកការងារ និងសម្ភាសដោយផ្ទាល់ និងតាមប្រព័ន្ធហ្សូមជាមួយរោងចក្រ និងក្រុមហ៊ុននានា។ ជាងនេះទៅទៀតក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត និងអាជ្ញាធរខេត្ត ក៏បានផ្តល់ការគាំទ្រជាស្មារតី និងសម្ភារៈជាហូរហែជូនបងប្អូនប្រជាពលករ ដែលស្ថិតក្នុងដែនសមត្ថកិច្ចរបស់ខ្លួនផងដែរ។
ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត បានស្នើសុំបងប្អូនប្រជាពលករ សូមបន្តរក្សាភាពអត់ធ្មត់ និងថែរក្សាសុខភាពឱ្យបានល្អ ជាពិសេសខិតខំស្វែងរកឱកាសការងារធ្វើ ឬបន្តទទួលយកការបណ្តុះបណ្តាលជំនាញផ្សេងៗ ដើម្បីជួយទ្រទ្រង់ដល់ជីវភាពផ្ទាល់ខ្លួន និងក្រុមគ្រួសារផង និងសេដ្ឋកិច្ចរបស់ប្រទេសជាតិយើងផងដែរ ព្រមទាំងបានបន្តលើកទឹកចិត្តឱ្យប្រជាពលរដ្ឋខ្មែរ ជាពិសេសបងប្អូនពលករនៅទីនេះ ចូលរួមជំរុញ បង្កើត គាំទ្រ និងលើកកម្ពស់ការគាំទ្រផលិតផលក្នុងស្រុក ដោយម្ខាងផលិត និងម្ខាងទៀតប្រើប្រាស់ តាមទិសស្លោក «ខ្មែរប្រើប្រាស់ផលិតផលខ្មែរ» និង «ខ្មែរត្រូវផលិតដោយប្រើប្រាស់របស់ខ្មែរ» ហើយ «រដ្ឋជួយគាំទ្រអ្នកផលិតផលិតផលខ្មែរ»។ ឯកឧត្តមក៏បានផ្តល់ការណែនាំបន្ថែមដោយសូមឱ្យមានការគិតគូរឡើងវិញពាក់ព័ន្ធនឹងថ្លៃជួលដីស្រែ ដោយត្រូវគិតគូរដល់ការចែករំលែកផលចំណេញផង និងបន្ទុករបស់កសិករផងដែរ ក្នុងពេលលំបាកនេះ។
ឯកឧត្តម វង្សី វិស្សុត ក៏បានលើកឡើងផងដែរថា ក្នុងបរិការណ៍ដ៏ផុយស្រួយនៃបទឈប់បាញ់ក្នុងជម្លោះព្រំដែនកម្ពុជា-ថៃ, រាជរដ្ឋាភិបាលដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននឹងកំពុងប្រឹងប្រែងអស់ពីលទ្ធភាព ព្យាយាមដោះស្រាយបញ្ហាព្រំដែន ដោយសន្តិវិធី និងសន្តិភាព ដោយប្រើគោលការណ៍ច្បាប់អន្តរជាតិ ព្រមទាំងទប់កម្តៅមិនតបតនឹងការអុចអាលនិងកលល្បិចរបស់ថៃ។ ឯកឧត្តមបានសង្កត់ធ្ងន់ថា «សង្គ្រាមមិនអាចបញ្ចប់សង្គ្រាមបាននោះទេ ហើយកម្ពុជាយើងស្ងប់ស្ងៀម មិនមែនមានន័យថា កម្ពុជាយើងមិនបានធ្វើអ្វីនោះទេ»។ ដូចនេះ សូមប្អូនជឿទុកចិត្តលើសមត្ថភាពដឹកនាំ និងសមត្ថភាពដោះស្រាយបញ្ហារបស់ប្រមុខរាជរដ្ឋាភិបាលរបស់យើង គឺ សម្ដេចធិបតី ហ៊ុន ម៉ាណែត ដោយមានការជ្រោមជ្រែងពេញទំហឹងពី សម្ដេចតេជោ ហ៊ុន សែន ដែលកំពុងខិតខំធ្វើការមិនថាយប់ មិនថាថ្ងៃ ដើម្បីស្វែងរកមកវិញនូវសន្តិភាពជូនបងប្អូន។
ក្នុងស្មារតីចែករំលែកអំឡុងពេលដ៏លំបាកនេះ ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បាននាំយកនូវអំណោយថវិកាចែកជូនបងប្អូនតំណាងគ្រួសារប្រជាពលករ ដោយក្នុង១នាក់ទទួលបានថវិកាចំនួន ៥ម៉ឺនរៀល។ ទន្ទឹមនេះ ឯកឧត្តមរដ្ឋមន្ត្រី ហួត ហាក់ ក៏បាននាំយកនូវគ្រឿងឧបភោគបរិភោគសម្រាប់ចែកជូនបន្ថែម ដោយក្នុង១គ្រួសារទទួលបានមីខ្លាឃ្មុំ ១ កេស និងទឹកស៊ីអីវ ១យួរផងដែរ ៕ រដ្ឋបាលខេត្តកំពង់ធំ
