ខេត្តឧត្ដរមានជ័យ៖ ប្រជាពលរដ្ឋបានរាយការណ៍មកថា! មានទីតាំងល្បែង(ជល់មាន់)និង(ឆ្នោតឡូតូ)តាមប្រព័ន្ធអនឡាញ ជាច្រើនកន្លែង ស្ថិតក្នុងស្រុកអន្លង់វែង ខេត្តឧត្ដរមានជ័យ បើកឲ្យក្រុមញៀនល្បែងចូលលេងអនាធិបតេយ្យ អាជ្ញាធរនិងសមត្ថកិច្ចមូលដ្ឋានមិនបង្ក្រាប! ដែលហ៊ានផ្គើននិងបទបញ្ជាដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រ កម្ពុជា។
ជាក់ស្ដែងនៅថ្ងៃពុធ ទី១៩ ខែមិថុនា ឆ្នាំ២០២៤នេះ សារព័ត៌មានយើងបានចុះទៅយកព័ត៌មានដោយផ្ទាល់ នូវតាមទីតាំងនីមួយៗ តាមសេចក្ដីរាយការណ៍របស់ប្រជាពលរដ្ឋ ឃើញមានទីតាំងបើកលេងល្បែងស៊ីសង(ជល់មាន់)និង(ឆ្នោតឡូតូ) តាមប្រព័ន្ធអនឡាញខុសច្បាប់ជាច្រើនកន្លែងពាសពេញក្នុងទឹកដី ស្រុកអន្លង់វែង ខេត្តឧត្ដរមានជ័យ ដែលមានទីតាំងសរុបទាំងអស់ចំនួន៥កន្លែងរួមមាន៖
ទី១.ស្ថិតនៅចំណុចផ្ទះប្រជាពលរដ្ឋ ភូមិថ្នល់កែង ហៅ(៩៨០) ឃុំអន្លង់វែង ស្រុកអន្លង់វែង ខេត្តឧត្ដរមានជ័យ។
ទី២. ស្ថិតនៅចំណុចក្នុងហាងលក់កាហ្វេ ជិតចំណតរថយន្ដចាស់ ខាងត្បូងផ្សារចាស់ ប្រហែលជាង ១០០ម៉ែត្រ ស្រុកអន្លង់វែង។
ទី៣. ស្ថិតនៅចំណុចក្នុងហាងលក់កាហ្វេ ខាងលិចរង្វង់មូលអន្លង់វែង ចម្ងាយប្រហែលជាង ៥០០ម៉ែត្រ។
ទី៤. ស្ថិតនៅចំណុចក្នុងហាងលក់កាហ្វេ ជិតផ្លូវបំបែកទៅទីរួមខេត្តឧត្ដរមានជ័យ ខាងជើងហ្ការាសសាំងសូគីមិច ប្រហែលជិត១០០ម៉ែត្រ។
ទី៥. ស្ថិតនៅចំណុចផ្ទះប្រជាពលរដ្ឋ ទល់មុខឃ្លាំង(អំបិល+ស្ករស) ភូមិទឹកជប់ ឃុំត្រពាំងប្រីយ៍ ស្រុកអន្លង់វែង ខេត្តឧត្ដរមានជ័យ។
មានមតិជាច្រើនបានលើកឡើងថា បុគ្គលដែលហ៊ានបើកល្បែងស៊ីសង(ជល់មាន់)តាមអនឡាញជាច្រើនកន្លែង ពាសពេញក្នុងស្រុកអន្លង់វែង ខេត្តឧត្ដរមានជ័យ ប្រហែលមានខ្នងបង្អែករឹងមាំហើយមានឥទ្ធិពលទៀតផង ទើបហ៊ានធ្វើអ្វីៗតាមទំនើងចិត្តបែបនេះ។
ជាងនេះទៅទៀត ប្រជាពលរដ្ឋរស់នៅក្នុងស្រុកអន្លង់វែងនាំគ្នាសង្ស័យ មន្ត្រីអាជ្ញាធរនិងសមត្ថកិច្ចពាក់ព័ន្ធក្នុងមូលដ្ឋាន មួយចំនួន សម្ងំទទួលលាភសការៈ និងផលប្រយោជន៍ខ្លះៗពីម្ចាស់ល្បែងទាំងនេះរួចផងក៏មិនដឹង ទើបមានបើកល្បែងស៊ីសងដូចជា(ជល់មាន់)និង(ឆ្នោតឡូទូ)តាមអនឡាញជាច្រើនកន្លែង ទុកឲ្យក្រុមញៀនល្បែងទាំងនោះ ចូលលេងគគ្រឹកគគ្រេង គ្មានការបង្ក្រាបឬទប់ស្កាត់ទាល់តែសោះ។
មជ្ឈដ្ឋានខាងក្រៅនិងប្រជាពលរដ្ឋក្នុងមូលដ្ឋានខាងលើបានការរិះគន់ចំៗថា បើគ្មានការឃុបឃិតគ្នាជាប្រព័ន្ធ ហើយមានខ្នងបង្អែករឹងមាំទេនោះ ម្ចាស់បនល្បែងនិងបក្សពួករបស់ខ្លួន មិនអាចដើរពង្រាយទីតាំងបើកបនល្បែងសុីសង នៅលើទឹកដីក្នុងស្រុកអន្លង់វែងបានឡើយ។
ប្រភពដដែលបានបន្ថែមថា ក្តីកង្វល់របស់ប្រជាពលរដ្ឋរស់នៅសព្វថ្ងៃនេះ មានការព្រួយបារម្ភនិងភាពភ័យខ្លាចយ៉ាងខ្លាំង ចំពោះសុខទុក្ខនិងសុវត្ថិភាពគ្រួសារពួកគាត់ ព្រោះថាទីណាមានល្បែងស៊ីសង ទីនោះមិនយូរមិនឆាប់ទេ និងកើតមាននូវអំពើចោរកម្ម អំពើឃាតកម្ម និងបទល្មើសផ្សេងៗដូចជា ចោរលួច ឆក់ ប្លន់ ជាពិសេស អំពើហិង្សាក្នុងគ្រួសារជាដើម។
ជុំវិញបញ្ហានេះប្រជាពលរដ្ឋក៏ដូចមហាជនទូទៅបានលើកឡើងថា តើឯណាទៅ ភូមិ.ឃុំ.សង្កាត់.មានសុវត្ថិភាពទាំង៧ចំណុច ដែលប្រមុខរាជរដ្ឋាភិបាលបានកំណត់ និងដាក់ចេញឲ្យមន្ត្រីថ្នាក់ក្រោមជាតិអនុវត្តន៍ទប់ស្កាត់ និងបង្ក្រាបទីតាំងល្បែងស៊ីសងគ្រប់ប្រភេទកន្លងមកនោះ?
សូមរំលឹកថាថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រ កម្ពុជា បានចេញបទបញ្ជាឲ្យ អភិបាលរាជធានីខេត្តទាំងអស់នូវទូទាំងប្រទេស ត្រួតពិនិត្យជាបន្ទាន់លើទីតាំងល្បែងផ្សងសំណាង សូមចាត់វិធានការបិទជាបន្ទាន់ និងរាយការណ៍ផ្ទាល់ជូន(សម្តេច)។
ជុំវិញបញ្ហានេះ ប្រជាពលរដ្ឋ សំណូមពរដល់ ឧត្តមសេនីយ៍ទោ ខូវ លី ស្នងការដ្ឋាននគរបាលខេត្តឧត្ដរមានជ័យ ជាពិសេស ឯកឧត្តម ប៉ែន កុសល្យ អភិបាលនៃគណៈអភិបាលខេត្តឧត្ដរមានជ័យ សូមជួយចាត់មន្ត្រីក្រោមឱវាទ ចុះទប់ស្កាត់ទង្វើមិនប្រក្រតីរបស់បុគ្គលដែលហ៊ានបើកល្បែងស៊ីសង(ជល់មាន់)និង(ឆ្នោតឡូតូ)តាមអនឡាញជាច្រើនកន្លែង ស្ថិតក្នុងភូមិសាស្ត្រខាងលើនេះផង ដើម្បីពង្រឹងសន្តិសុខសង្គម៕
អង្គភាពយើងខ្ញុំធ្វើការផ្សព្វផ្សាយនេះ ទៅតាមវិជ្ជាជីវៈ រិះគន់ក្នុងន័យស្ថាបនា មិនមានចេតនាញុះញង់ បំបែកបំបាក់ បុគ្គលស្ថាប័ន ឬអង្គភាពណាមួយឡើយ ហើយក៏ដើម្បីពាំនាំដំណឹងអំពីសកម្មភាព ក៏ដូចព្រឹត្តិការណ៍ក្នុងការជម្រាបជូនដល់ស្ថាប័នពាក់ព័ន្ធឲ្យបានជ្រាប។
