ខេត្តកំពង់ធំ៖ លោក ឡង គឺសឹង ប្រធានគណ:បញ្ជាការឯកភាពរដ្ឋបាលស្រុកសណ្ដាន់ បានដឹកនាំកម្លាំងសមត្ថកិច្ចបង្ក្រាប ល្បែងស៊ីសង ជល់មាន់ បៀ អាប៉ោង ដែលបានលាក់ខ្លួននៅក្នុងចំការស្វាយចន្ទីរ មួយកន្លែង ស្ថិតនៅក្នុងភូមិ ៩៩ ឃុំមានរិទ្ធ ស្រុកសណ្តាន់ ខេត្តកំពង់ធំ នៅព្រឹកថ្ងៃទី ១២ ខែសីហា ឆ្នាំ ២០២០។
ប្រតិបត្តិការបង្ក្រាប ទីតាំងល្បែងស៊ីសង ដែលប្រៀបបានជាកន្លែងថ្នាល់បណ្តុះអំពើឧបាយមុខ បង្កើតក្រុមចោរ និងជាឈ្នួនបង្ក្រាត់អំពើហឹង្សាក្នុងគ្រួសារ ត្រូវបានបង្ក្រាបរុះរើកំទេចចោល នៅតំបន់ ៩៩ នៃឃុំមានរិទ្ធ ស្រុកសណ្តាន់ ខេត្តកំពង់ធំ រួមទាំងបានដឹកសម្ភារៈមួយចំនួន យកមករក្សាទុក ហើយបានធ្វើកិច្ច សន្យាជាមួយម្ចាស់ចំការស្វាយចន្ទី មិនឲ្យមានល្បែងស៊ីសងកើតឡើងជាលើកទី២ បានឡើយ ។
លោក ឡង គឺសឹង អភិបាលស្រុកសណ្តាន់ បានមានប្រសាសន៍ថា ក្រោមការយកចិត្តទុកដាក់របស់ ឯកឧត្តម សុខ លូ អភិបាលនៃគណអភិបាលខេត្តកំពង់ធំ និងជាប្រធានគណបញ្ជាការឯកភាពរដ្ឋបាលខេត្តកំពង់ធំ តែងតែ ណែនាំចង្អុលបង្ហាញ ពីការងារបំរើប្រជាពលរដ្ឋដោយស្មោះត្រង់ ទោះបីក្នុងតំលៃណាក៏ដោយ ការពារសុខ សុវត្តិភាព ផ្តល់ភាពជឿជាក់ និងភាពកក់ក្តៅដល់ប្រជាពលរដ្ឋ ដែលប្រៀបបាននិងម្តាយនិងកូន និងមិនឲ្យមានការប្រព្រឹត្តល្បែងស៊ីសង នៅក្នុងមូលដ្ឋានជាដាច់ខាត លោកអភីបាល ក៏បានកោតសរសើរ ដល់អ្នកសារព័ត៌មាន ដែលបានផ្តល់កិច្ច សហការទីតាំង បនល្បែងជល់មាន់ ដោយខុសច្បាប់ គឺជាការចូលរួមចំណែក យ៉ាងធំក្នុងការអនុវត្តគោលនយោបាយភូមិឃុំមានសុវត្តិភាពទាំងចំនុច របស់រាជរដ្ឋាភិបាល ដើម្បីការពារទប់ស្កាត់ បង្ក្រាបកុំឲ្យមានល្បែងស៊ីសង ចោរលួច ចោរប្លន់ និងបទល្មើសផ្សេងៗនៅក្នុងមូលដ្ឋាន ។
លោកអភិបាល បានបន្តថា បន្ទាប់ពីទទួលបានដំណឹង លោកបានដឹកនាំកម្លាំងផ្ទាល់ចុះទៅរុះរើទីតាំងទាំងអស់នោះ ចោលហើយបានធ្វើកិច្ចសន្យា ជាមួយម្ចាស់ចំការមិនអោយប្រព្រឹត្តអំពើល្បែងស៊ីសងនេះជាលើកទី២ឡើយ ៕
