នៅព្រឹកថ្ងៃទី ២០ ខែ កញ្ញា ឆ្នាំ២០២៣នេះ ថ្នាក់ដឹកនាំខេត្ត មន្ត្រីរាជការនៅសាលាខេត្តសៀមរាប ក៏ដូចនៅតាមមន្ទីរ អង្គភាព ទីវត្តអារាម រដ្ឋបាលក្រុង ស្រុក និង គ្រឹះស្ថានសិក្សាទូទាំងខេត្តសៀមរាប បានរៀបចំធ្វើការសាទរ អបអរសាទរព្រឹត្តិការណ៍ជាប្រវត្តិសាស្ត្រ ដែលប្រាសាទកោះកែរ ត្រូវបានចុះក្នុងបញ្ជីបេតិកភណ្ឌរបស់ពិភពលោក ។
និយាយដោយឡែក នៅសាលាខេត្តសៀមរាប ក៏បានរៀបចំពិធីក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ប្រាក់ សោភណ្ឌ អភិបាលនៃគណៈអភិបាលខេត្ត ដោយមានការអញ្ជើញចូលរួមពីសមាជិកសមាជិកាក្រុមប្រឹក្សាខេត្ត គណៈអភិបាលខេត្ត មន្ត្រីរាជការ និង ថ្នាក់ដឹកនាំមន្ទីរ ក្នុងការអរគុណរាជរដ្ឋាភិបាលកម្ពុជា ក្រោមកិច្ចដឹកនាំដ៏ឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានសម្តែងការអបអរសាទរ និង មានមោទនភាព ដែលបានប្រាសាទកោះកែរ ត្រូវបានចុះក្នុងបញ្ជីបេតិកភណ្ឌរបស់ពិភពលោក ដើម្បីឲ្យពិភពលោកកាន់តែបានស្គាល់ពីស្នាដៃ ដ៏អស្ចារ្យរបស់បុព្វបុរសខ្មែរ ដែលបានកសាងប្រាសាទយ៉ាងធំ ស្កឹមស្កៃ ដែលបានបន្សល់ទុកសម្រាប់កូនចៅជំនាន់ក្រោយ ស្ថិតនៅក្នុងភូមិស្រយ៉ង់ជើងឃុំស្រយ៉ង់ស្រុកគូលេន ខេត្តព្រះវិហារ ត្រូវបានចុះបញ្ជីជាសម្បត្តិបេតិកភណ្ឌពិលោកនៅថ្ងៃទី១៧ ខែ កញ្ញា ឆ្នាំ២០២៣ នៅក្នុងកិច្ចប្រជុំរបស់អង្គការយូណេស្កូ នៅទីក្រុងរីយ៉ាដ ប្រទេសអារ៉ាប៊ីសាអូឌីត ។
មានប្រសាសន៍នោះដែរឯកឧត្តម ប្រាក់ សោភណ្ឌ អភិបាលនៃគណៈអភិបាលខេត្តសៀមរាប បានសម្តែងនូវអារម្មណ៍រំភើបដែលប្រាសាទកោះកែរ បានចូលជាសម្បត្តិបេតិកភណ្ឌ ពិភពលោក ព្រមទាំងបានសម្តែងការអរគុណដល់ រាជរដ្ឋាភិបាលដែលបានយកចិត្តទុកដាក់ការពារបេតិកភណ្ឌរបស់ប្រទេសជាតិ និង បានបង្ហាញថា ប្រាសាទកោះកេរ្ត៍ជាសម្បត្តិដូនតាខ្មែរ បាន បន្សល់សម្បត្តិមានតម្លៃដ៏មហាសាល សម្រាប់កូនចៅខ្មែរគ្រប់ជំនាន់ ។
ឯកឧត្តមបានបញ្ជាក់ថា ក្រោយពីបញ្ចប់សង្គ្រាមស៊ីវិល និង ប្រទេសទទួលនូវសុខសន្តិភាពពេញផ្ទៃប្រទេស នៅគ្រប់ទីប្រាសាទដែលតែងរងការយាយីដោយភ្លើងសង្គ្រាម ត្រូវបានរាជ រដ្ឋាភិបាលកម្ពុជា បានធ្វើការបោសសម្អាតយុទ្ធភ័ណ្ឌមិនផ្ទុះ ដើម្បីសុខសុវត្ថិភាពដល់ប្រជាពលរដ្ឋ និងបម្រើវិស័យទេសចរណ៍ ។
ឯកឧត្តមបានបញ្ជាក់ថា ក្នុងនាមប្រជាពលរដ្ឋម្នាក់ និង ជាអាជ្ញាធរខេត្ត សូមអរគុណដល់រាជរដ្ឋាភិបាលដែលបានយកចិត្តទុកដាក់ការពារបេតិកភណ្ឌរបស់ប្រទេសជាតិយើង ក៏ដូចជាបេតិកភណ្ឌរបស់ពិភពលោកទាំងមូលនិងការពារ កេរ្ត៍ដំណែល របស់ដូនតាយើងបានគង់វង្ស ទោះបីជាឥឡូវចាស់ទ្រុឌទ្រោម រេចរឹលមែនពិត ក៏ប៉ុន្តែវាជាសម្បត្តិជាតិយើងដែលមានតម្លៃមិនអាចកាត់ថ្លៃបាន ។ ហើយក៏គ្មានប្រទេសណាលួចចម្លងបានដូចគ្នា ទោះបីជាថាអាចសង់បានចេញជារូបរាងដូចគ្នា ក៏ប៉ុន្តែអាយុកាលគឺខុសគ្នាផងដែរ ។ សម្បត្តិបេតិកភណ្ឌនេះគឺមានតម្លៃសម្រាប់ប្រជាជននិងប្រជាជាតិយើងទាំងមូល ។
ម្យ៉ាងទៀត យើងគ្រប់រូបក៏ត្រូវធ្វើការស្វែងយល់ អំពីសម្បត្តិវប្បធម៌របស់ជាតិខ្លួន ក្នុងការចូលរួមអភិរក្ស ថែរក្សាកេរ្តិ៍មរតកដូនតាយើង ដើម្បីឲ្យក្មេងៗ ជំនាន់ក្រោយបានទៅទស្សនាកម្សាន្ត និង បានស្គាល់ថា អ្វីដែលជារបស់ដែលមានតម្លៃមិនអាចកាត់ថ្លៃបាន ។
ឯកឧត្តម ប្រាក់ សោភណ្ឌ ក៏បានគូសបញ្ជាក់ថា ថ្ងៃ ១៧ ខែកញ្ញា ដែលជាថ្ងៃអង្គការយូណេស្កូ បានចុះបញ្ជីនូវប្រាសាទកោះកែរ ជាសម្បត្តិបេតិកភណ្ឌពិភពលោក ក្នុងនាមជាកូនខ្មែរពិតជាមានក្ដីរីករាយ ព្រោះការដែលបានចុះទៅក្នុងបេតិកភណ្ឌពិភពលោក វាធ្វើឲ្យពិភពលោក កាន់តែស្គាល់ប្រទេសកម្ពុជា និង បានស្គាល់នូវប្រាសាទកោះកែរជារបស់ខ្មែរ ដែលជាអតីតរាជធានីកាលជាង១ពាន់ឆ្នាំមុន ។
ក្នុងនោះដែរឯកឧត្តម ក៏បានអំពាវនាវដល់ប្រជាពលរដ្ឋ ក៏ដូចជាសិស្ស និសិត្ស យុវជនខ្មែរយើង និង ភ្ញៀវទេសចរ ជាតិ អន្តរជាតិ សូមអញ្ជើញទៅទស្សនាតំបន់រមនីយដ្ឋានប្រវត្តិសាស្ត្រ ដែលជាសម្បត្តិវប្បធម៌របស់ជាតិខ្មែរយើង សំខានប្រាសាទកោះកែរ ដែលត្រូវបានចុះបញ្ជី ជាសម្បត្តិបេតិកភណ្ឌពិភពលោក កាលពីថ្ងៃ ១៧ ខែកញ្ញា ដើម្បីសិក្សាស្វែងយល់អំពី អរីយ្យធម៌ វប្បធម៌ ទំនៀមទាប់ដូនតាខ្មែរយើងបានបន្សល់ទុកជាកេរ្តិ៍តំណេលតរៀងមក ។
យោងតាមឯកសារដែលផ្សព្វផ្សាយអាជ្ញាធរព្រះវិហារ ប្រាសាទកោះកែរបានកសាងឡើងក្នុងរជ្ជកាលព្រះបាទជ័យវរ្ម័នទី៤ ដើម្បីឧទ្ទិសដល់អាទិទេពមួយអង្គឈ្មោះ ត្រីភូវនេស្វរៈ ដែលសិលាចារិក ជាភាសាខ្មែរថា “កម្រតែងរាជា” ៕
