សៀមរាប៖ ទីតាំងការដ្ឋានបូមខ្សាច់ស្ដារស្ទឹងរលួសមួយកន្លែងត្រូវបានពលរដ្នរឹះគន់ថារំលោភលើដីអ្នកជិតខាងនិង កាយដីព្រៃវាទធ្វើជាកន្លែងបូមខ្សាច់កំពុងតែធ្វើសកម្មភាពយ៉ាងគគ្រឹកគគ្រេងបំផុត មិនទាន់មានអាជ្ញាធរឬ សមត្ថកិច្ចជំនាញណាចុះទប់ស្កាត់បង្ក្រាបនិងពិនិត្យអោយច្បាស់់លាស់នោះទេដែលមានទីតាំងស្ថិតនៅភូមិត្រាច ឃុំបល្ល័ង្គនិង ឃុំអំពិល ស្រុកប្រាសាទបាគង ខេត្តសៀមរាប។
តាមប្រភពព័ត៏មានបានអោយដឹងថាទីតាំងបូមខ្សាច់ខាងលើហាក់ដូចជាមានភាពមិនប្រក្រតីនោះទេ ដោយសារសុំច្បាប់ស្តារស្ទឹង តែចំនុចខាងលើ ពុំមានស្ទឹងនោះទេ ហើយមួយថ្ងៃៗគេឃើញរថយន្ដពី១៥ទៅ២០គ្រឿងចូលដឹកខ្សាច់យ៉ាងគគ្រឹកគគ្រេងនិងបើកបរលឿន ហុយដី និងបង្កហានីភ័យផ្សេងៗដល់អ្នករួមដំណើរ។
យោងតាមលិខិតបានបញ្ជាក់ទីតាំងបូមខ្សាច់នេះ គឺអាជ្ញាបណ្ណចេញដោយក្រសួងរ៉ែនិងថាមពលបានអនុញាតឲ្យក្រុមហ៊ុនយុវពាណិជ្ជ ដែលមានអាសយដ្ឋាននៅភ្នំពេញ ធ្វើអាជីវកម្មខ្សាច់សំណង់នៅតំបន់ស្ទឹងរលួស ភូមិត្រាច ឃុំបល្ល័ង្កនិងឃុំអំពិល ស្រុកប្រាសាទបាគង ខេត្តសៀមរាប ចុះហត្ថលេខាដោយលោក ស៊ុយ សែម រដ្ឋមន្ត្រីក្រសួងរ៉ែនិងថាមពល នៅថ្ងៃទី០២ខែមេសាឆ្នាំ២០១៩ដល់ថ្ងៃទី០២ ខែមេសា ឆ្នាំ២០២១ ដោយមានសុពលភាព២ឆ្នាំ។
លោកឡុង កុសល អ្នកនាំពាក្យអាជ្ញាធរជាតិអប្សរាបានឆ្លើយតបតាម ប្រព័ន្ធតេលេក្រាមនៅថ្ងៃទិ១៧
ខែឧសភា ឆ្នាំ២០២០នេះថាអោយសួរនាំទៅមន្ទីរនិងខេត្ត ព្រោះគេមានច្បាប់ពីក្រសួងរ៉ែថាមពល និងបានទទួលស្គាល់ថាជាការត្រឹមត្រូវ ព្រោះក្រុមហ៊ុនយុវពាណិជ្ជ ធ្វើអាជីវកម្មតំបន់ខាងលើដោយបានចុះហត្ថលេខាដោយលោកស៊ុ ម៉ាប់ អតីតប្រធានអាជ្ញាធរជាតិអប្សរាទៀតផង។
លោកង៉ាន ភិរុណ អភិបាលរងខេត្តសៀមរាបបានបញ្ជាក់ថាករណីនេះ ក្រុមហ៊ុនមានច្បាប់តាំងពីជំនាន់លោកឃឹម ប៊ុនសុង អតីតអភិបាលខេត្តសៀមរាប។
ម្ចាស់អាជីវកម្មមិនបានឆ្លើយតបតាមប្រព័ន្ធទូស័ព្ទនៅថ្ងៃទី១៧ខែ ឧសភា ឆ្នាំ២០២០ទេ ដោយនិយាយថា កំពុងជាប់រវល់។
ទោះបីយ៉ាងណាប្រជាពលរដ្ឋ រស់នៅតំបន់ខាងលើសំណូមពរអោយអាជ្ញាធរពាក់ព័ន្ធចុះត្រួតពិនិត្យមើលទីតាំងខាងលើអោយបានជាក់លាក់ ៕ ប៊ុនរិទ្ធី
