កំពង់ធំ ៖ នៅព្រឹកថ្ងៃទី២៩ ខែមេសា ឆ្នាំ២០២០ ឯ.ឧ សុខ លូ អភិបាលខេត្តកំពង់ធំ និងក្រុមមការងារថ្នាក់ខេត្ត ស្រុក ឃុំ ភូមិ និងមន្ទីរគ្រប់វិស័យពាក់ព័ន្ធបានចុះទៅចែកឧបករណ៍អគ្គីសនី ដើរដោយព្រះអាទិត្យ (សូឡា) ជូនសម្បទានិកចំនួន ៥៥៩ គ្រួសាររបស់គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចជំហាន២ (LASED II) នៅឃុំដូង ស្រុកប្រាសាទបល័ង្ក ខេត្តកំពង់ធំ ។
នៅក្នុងឱកាសនោះ ឯ.ឧ សុខ លូ បានផ្តាំផ្ញើដល់សម្បទានិក ទាំងអស់ត្រូវថែរក្សាសុខភាពឱ្យបានល្អ ជាពិសេសត្រូវការពារខ្លួនពីជំងឺកូវីដ-១៩។ ដោយសាររដូវវស្សាឈានចូលមកដល់បណ្តើៗហើយ។ ឯ.ឧ សុខ លូ ក៏បានលើកទឹកចិត្ត និងជំរុញឱ្យសម្បទានិក របស់គម្រោងត្រៀមលក្ខណៈចូលបង្កបង្កើនផល លើដីកសិកម្មដែលរាជរដ្ឋាភិបាលបានចែកជូន និងចូលទៅរស់នៅឱ្យបានគ្រប់ៗគ្រួសារ ដើម្បីផលប្រយោជន៍បងប្អូនទៅថ្ងៃអនាគត។
បន្ទាប់ពីនោះទៀត ឯ.ឧ សុខ លូ និងក្រុមការងារក៏បានបន្តចុះពិនិត្យមើលការអភិវឌ្ឍហេដ្ឋារចនាសម្ព័ន្ធ និងការរស់នៅរបស់សម្បទានិកនៅលើទីតាំងដីសម្បទានសង្គមកិច្ចផ្ទាល់ផងដែរ។
គួររំលឹកថា ដើម្បីគាំទ្រដល់កិច្ចដំណើរការចូលសង់ជម្រកស្នាក់នៅ និងបង្កបង្កើនផល គម្រោង បានផ្តល់ជូនសម្បទានិកក្នុងមួយគ្រួសារនូវ :
១-កញ្ចប់សាងសង់ជម្រករួមមានស័ង្កសីចំនួន ៤០ សន្លឹក
២-កញ្ចប់គាំទ្រកសិកម្មរួមមានកូនស្វាយចន្ទីចំនួន ១៣០ ដើម ដំណាំគម្របដី (គ្រាប់សណ្តែកខៀវ) ចំនួន ២០ គីឡូក្រាម កូនឈើហូបផ្លែចំនួន ៥ មុខ ស្មើនឹង ៥០ ដើម គ្រាប់ពូជបន្លែចំនួន ៦ មុខ និងសម្ភារៈកសិកម្មចំនួន ៨ ប្រភេទ
៣-កញ្ចប់លំនៅឋាន រួមមានអង្ករចំនួន ២០០ គីឡូក្រាម មុងចំនួន ១ កន្ទេលចំនួន ១ តង់ប្លាស្ទិកចំនួន ១ ធុងចម្រោះទឹកចំនួន ១ និងធុងស្តុកទឹក ចំណុះ២០០លីត្រ ចំនួន១ រួចមកហើយ ៕
