(កំពង់ធំ): ឯកឧត្តម ងួន រតនៈ អភិបាលនៃគណៈខេត្តកំពង់ធំ នាព្រឹកថ្ងៃទី៣១ ខែសីហា ឆ្នាំ២០២២ អញ្ជើញជាអធិបតីក្នុងពិធីប្រកាសចូលកាន់មុខតំណែងលោក ស៊ិន វណ្ណវុឌ្ឍ ជាអភិបាលស្រុកសណ្ដាន់ ជំនួសលោក អ៊ុត វណ្ណរ៉ា ដែលផ្ទេរតំណែងទៅកាន់ស្រុកកំពង់ស្វាយថ្នីៗនេះ។ ដើម្បីបន្តគាំទ្រលោកអភិបាលស្រុកថ្មី ដូចអ្វីដែលយើងធ្លាប់បាន គាំទ្រអភិបាលស្រុកចាស់ ដើម្បីសម្រេចគោលដៅតែមួយ ចំពោះការងាររដ្ឋបាល ការដោះស្រាយបញ្ហាប្រឈម សំណូមពរ ការផ្ដល់សេវាសាធារណៈ ការរក្សាសន្តិសុខសណ្តាប់ធ្នាប់ នៅក្នុងមូលដ្ឋានឲ្យបានល្អប្រសើរជាបន្តបន្ទាប់តទៅទៀត ។
ថ្លែងនៅក្នុងកម្មវិធី លោកអភិបាលខេត្តកំពង់ធំ បានមានប្រសាសន៍ថា៖ ក្នុងនាមជាមន្ត្រីរាជការបម្រើប្រជាពលរដ្ឋ ត្រូវធ្វើឲ្យប្រជាពលរដ្ឋស្រឡាញ់ មានភាពជឿជាក់ និង ទុកចិត្ត ការគ្រប់គ្រងបុគ្គលិកនេះបានល្អ ជាមួយវិន័យឱ្យមានប្រសិទ្ធផលការងារ នៅតាមអង្គភាព និង តាមមូលដ្ឋានរបស់បងប្អូន។ ការដាស់តឿនជំរុញបន្ថែម នូវកិច្ចការប្រចាំថ្ងៃទាក់ទងនឹងការថែរក្សាសន្តិសុខសណ្ដាប់ធ្នាប់សាធារណៈ ស្ថេរភាពនយោបាយ ដើម្បីនិរន្តរភាពរដ្ឋបាលក្នុងការផ្ទេរភារកិច្ច លោកអភិបាលនៅទីនេះ ។
ឯកឧត្តម ងួន រតនៈ ក៏បានលើកទឹកចិត្តដល់ លោក ស៊ិន វណ្ណវុឌ្ឍ អភិបាលស្រុកដែលត្រូវចូលកាន់មុខតំណែងថ្មីនាពេលនេះ ត្រូវយកចិត្តទុកដាក់នូវការងារ
គ្រប់គ្រងមួយចំនួន អំពីការផ្តល់សេវាសាធារណៈ និងការដោះស្រាយបញ្ហាប្រឈមនៅមូលដ្ឋាន ត្រូវបន្តខិតខំលើកកម្ពស់ក្នុងការផ្តល់សេវាចាំបាច់នានាដូចជា សេវា សុខាភិបាល អប់រំ សង្គមកិច្ច និង សេវាសាធារណៈដទៃទៀត ប្រកបដោយស្មារតីទទួលខុសត្រូវខ្ពស់ មាន តម្លាភាព និង គណនេយ្យភាពចំពោះប្រជាពលរដ្ឋ។
អំពីសន្តិសុខ សណ្តាប់ធ្នាប់សាធារណៈ និង សុវត្ថិភាពសង្គម គណៈបញ្ជាការឯកភាពរដ្ឋបាលស្រុក ត្រូវដឹកនាំអាជ្ញាធរ កងកម្លាំងមានសមត្ថកិច្ចគ្រប់លំដាប់ថ្នាក់ ឲ្យបង្កើនការថែរក្សាការពារសន្តិសុខ និង សណ្តាប់ធ្នាប់សាធារណៈ ក្នុងក្របខ័ណ្ឌស្រុកទាំងមូល ចូលរួមអនុវត្តគោលនយោបាយ “ភូមិ ឃុំមានសុវត្ថិភាព” ដើម្បីរួមគ្នាបង្ការ ទប់ស្កាត់ បង្ក្រាបបទល្មើសគ្រប់ប្រភេទនៅតាមមូលដ្ឋានរៀងៗខ្លួន ។ ពង្រឹងវិធានការរដ្ឋបាល និងវិធានការច្បាប់ ក្នុងការអនុវត្តច្បាប់ចរាចរផ្លូវគោក ដើម្បីកាត់បន្ថយគ្រោះថ្នាក់ចរាចរណ៍បន្ថែមទៀត ។
ជាចុងក្រោយ ឯកឧត្តមក៏បានផ្តាំផ្ញើដល់អ្នកចូលរួមទាំងអស់ ដើម្បីរួមគ្នាសម្រេចគោលដៅជាច្រើន ត្រូវខិតខំពង្រឹងស្មារតីសាមគ្គីភាព ឯកភាពផ្ទៃក្នុងឲ្យបានល្អនៅក្នុងក្រុមប្រឹក្សា គណៈអភិបាល មន្ត្រីរាជការ និងកងកម្លាំងមានសមត្ថកិច្ចគ្រប់លំដាប់ថ្នាក់។
ដោយឈរលើមូលដ្ឋាននៃការលើកកម្ពស់ប្រសិទ្ធភាពការងារ ការគោរពច្បាប់ គោរពគោលការណ៍នានា របស់រដ្ឋ និងពង្រឹងរបៀបរបបធ្វើការងារ ដើម្បីលើកកម្ពស់ការទទួលខុសត្រូវ និង ភាពជាម្ចាស់របស់មន្ត្រីនៅក្នុងការបំពេញតួនាទី ភារកិច្ចរបស់ខ្លួន សំដៅអភិវឌ្ឍន៍មូលដ្ឋាន និង ឆ្លើយតបចំពោះតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន ។
សូមលោកអភិបាលស្រុកថ្មីខិតខំរៀនសូត្រនៅក្នុងភូមិសាស្ត្ររដ្ឋបាលនៅទីនេះ ទោះបីធ្លាប់ធ្វើអភិបាលស្រុកនៅកន្លែងផ្សេងធ្លាប់ធ្វើជានាយករងនៅសាលាខេត្ត តែ នៅភូមិសាស្ត្រមួយ ដែលមានបញ្ហាមួយផ្សេងទៀតត្រូវរៀនសូត្រពីអ្នកនៅទីនេះឱ្យមានលក្ខណល្អប្រសើរ ៕
