សៀមរាប÷ ឯកឧត្ដម ទៀ សីហា អភិបាល នៃគណៈអភិបាលខេត្តសៀមរាប នៅព្រឹកថ្ងៃទី១៤ ខែមេសា ឆ្នាំ២០២០នេះ បានចុះត្រួតពិនិត្យ និងសួរសុខទុក្ខកងកម្លាំងចម្រុះ កំពុងប្រចាំនៅតាមគោលដៅ និង អាជ្ញាធរភូមិ ក្នុងស្រុកក្រឡាញ់ និង ស្រុកស្រីស្នំ ដែលជាស្រុកជាប់ព្រំប្រទល់ជាមួយ ខេត្តបន្ទាយមានជ័យ និង ខេត្តឧត្ដរមានជ័យ ដើម្បីអនុវត្តន៍បទបញ្ជា ការរឹតបន្តឹងការធ្វើដំណើរឆ្លងកាត់រវាងខេត្តនិងខេត្តក្នុងប្រទេស របស់រាជរដ្ឋាភិបាល ក្នុងការបង្ការទប់ស្កាត់ការឆ្លងរីករាលដាលនៃជម្ងឺកូវីដ១៩ ជាពិសេសការវិលត្រឡប់របស់ប្រជាពលរដ្ឋមកពីក្នុងនិងក្រៅប្រទេស ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ។
ក្នុងឱកាសចុះត្រួតពិនិត្យកម្លាំងចម្រុះប្រចាំការគោលដៅព្រំប្រទល់ខេត្តសៀមរាប ខេត្តឧត្ដរមានជ័យ និងបន្ទាយមានជ័យ ឯកឧត្ដម ទៀ សីហា បានសម្ដែងនូវការកោតសរសើរចំពោះកងកម្លាំងចម្រុះដែលកំពុងប្រចាំការនៅគោលដៅនេះ ដែលបានយកអស់កម្លាំងកាយចិត្តបំពេញភារកិច្ច តាមតួនាទីរបស់ខ្លួនដោយស្មារតីទទួលខុសត្រូវខ្ពស់ ជាពិសេសការអនុវត្តនូវបទបញ្ជាលេខ០២ របស់រាជរដ្ឋភិបាលកម្ពុជា បានយ៉ាងខ្ជាប់ខ្ជួន ប្រកបដោយប្រសិទ្ធភាព សំដៅរួមចំណែកក្នុងការទប់ស្កាត់ការឆ្លងរាលដាលជំងឺកូវីដ១៩ ខណៈដែលបច្ចុប្បន្ននេះ កំពុងកើតមានឡើងនៅលើសកលលោក បណ្ដាលឲ្យស្លាប់មនុស្សរាប់ម៉ឺននាក់ ។ ឯកឧត្ដម ទៀ សីហា បានណែនាំ និង ផ្ដាំផ្ញើដល់កងកម្លាំងចម្រុះដែលកំពុងប្រចាំការគោលដៅព្រំប្រទល់ខេត្តសៀមរាប និង ឧត្តរមានជ័យ ព្រមទាំង អាជ្ញាធរស្រុកស្រីស្នំ ត្រូវបង្កើនស្មារតីការយកចិត្តទុកដាក់បន្តទៀត តាមបទបញ្ជាលេខ០២ របស់រាជរដ្ឋភិបាលកម្ពុជា ឲ្យបានម៉ឺងម៉ាត់បំផុត ។
ដើម្បីជាការលើកទឹកចិត្ត ឯកឧត្ដម ទៀ សីហា បានឧបត្ថម្ភថវិកាមួយចំនួនដល់កងកម្លាំងចម្រុះប្រចាំការគោលដៅព្រំប្រទល់ខេត្តសៀមរាបនិង ខេត្តបន្ទាយមានជ័យ ក្នុងភូមិសាស្ត្រស្រុកក្រឡាញ់ និងទល់ខេត្តឧត្ដរមានជ័យ ក្នុងភូមិសាស្ត្រស្រុកស្រីស្នំ សម្រាប់ដោះស្រាយជីវភាពប្រចាំថ្ងៃ ។
ក្នុងឱកាសចុះសំណេះសំណាលជាមួយបងប្អូនមេភូមិ អនុភូមិ និងសមាជិកភូមិ នៃស្រុកទាំងពីរ ឯកឧត្ដមអភិបាលខេត្តក៏បាននាំយកនូវគ្រឿងឧបភោគបរិភោគ និងថវិកាមួយចំនួន ឧបត្ថម្ភជូនដល់បងប្អូនជាអាជ្ញាធរមូលដ្ឋាន ដែលជាអ្នកទទួលរង នូវហានីភ័យ ដោយនៅជិតបំផុតជាមួយប្រជាពលរដ្ឋដែលទើបវិលមកពីក្នុង និងក្រៅប្រទេស និង ដើម្បីបន្តពង្រឹង ផ្សព្វផ្សាយបន្ថែមទៀត ដល់ប្រជាពលរដ្ឋនៅតាមភូមិ ឲ្យកាន់តែយល់ដឹងច្បាស់ពីវិធីបង្ការ ការពារជម្ងឺកូវីដ១៩ និង ត្រូវត្រូវយកចិត្តទុកដាក់ ខ្ពស់ ក្នុងករណីមានអ្នកចំណូលថ្មីចូលមកស្នាក់នៅក្នុងមូលដ្ឋានរបស់ខ្លួន គឺត្រូវរាយការណ៍ មកថ្នាក់ឃុំសង្កាត់ ក្រុង ស្រុក ។
ឯកឧត្តមបានគូសបញ្ជាក់ថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ រដ្ឋបាលខេត្តសៀមរាប បានចុះត្រួតពិនិត្យនៃការអនុវត្តន៍បទបញ្ជារបស់រាជរដ្ឋាភិបាល ដើម្បីបង្ការទប់ស្កាត់ការរីករាលដាលនៃជម្ងឺកូវីដ ១៩ នៅតាមភូមិទាំង៩៥២ភូមិ នៃក្រុង ស្រុកទាំង១២ របស់ខេត្តសៀមរាប ។
ឆ្លៀតក្នុងឱកាសនោះដែរ ឯកឧត្តមអភិបាលខេត្ត ក៏បានចុះសួរសុខទុក្ខ បងប្អូនប្រជាពលរដ្ឋដែលទើបត្រឡប់មកពីក្នុង និងក្រៅប្រទេស ដែលបានកំពុងអនុវត្តន៍នីតិវិធីសុខាភិបាល ដោយដាក់ឲ្យនៅដោយឡែកពីសហគមន៍រយៈពេល១៤ថ្ងៃ នៅក្នុងអនុវិទ្យាល័យប្រិយ៍ ចំនួន ១៧នាក់ ស្ថិតក្នុងស្រុកស្រីស្នំ និង វិទ្យាល័យក្រឡាញ់ ចំនួន ១៤៤នាក់ ស្ថិតនៅក្នុងស្រុកក្រឡាញ់ ដើម្បីលើកទឹកចិត្ត និងផ្សព្វផ្សាយ ដល់ពួកគាត់ ឲ្យកាន់យល់ដឹងច្បាស់ពីការយកចិត្តទុក្ខដាក់របស់រាជរដ្ឋាភិបាល ជាពិសេសសម្ដេចតេជោ ក្នុងការបង្ការទប់ស្កាត់ ការរីករាលដាល នៃជម្ងឺកូវីដ១៩ នៅក្នុងសហគមន៍ និងអាយុជីវិតប្រជាពលរដ្ឋនៅទូទាំងព្រះរាជាណាចក្រកម្ពុជា។
ឯកឧត្ដម ទៀ សីហា បានផ្ដាំផ្ញើដល់បងប្អូនទាំងអស់ សូមស្ដាប់តាមការណែនាំរបស់មន្ត្រីសុខាភិបាល ព្រោះថា ប្រសិនបើយើងគ្មានជម្ងឺ ក្រុមគ្រួសារយើង និង សហគមន៍យើងក៏មិនមានជម្ងឺនេះដែរ ។ ដូច្នេះស្ថិតក្នុងដំណាក់កាលនៃសកលលោកកំពុងកើតមានជម្ងឺកូវីដ១៩នេះ សូមបងប្អូនទាំងអស់ត្រូវចេះអំពីវិធីការពារការឆ្លងជម្ងឺកូវីដ១៩ គឺត្រូវលាងដៃឲ្យបានញឹកញាប់ជាមួយសាប៊ូ ឬទឹកអាល់កុលលាងដៃ , ខ្ទប់មាត់ និងច្រមុះ នៅពេលក្អក ឬកណ្ដាស់ ដោយកន្សែង ក្រមា ក្រដាស ឬដោយកែងដៃ , ចៀសវាងប៉ះពាល់ជិតស្និទ្ធជាមួយអ្នកដែលមានគ្រុនក្ដៅ និងក្អក ឬផ្ដាសាយ , ចៀសវាងប៉ះពាល់ភ្នែក ច្រមុះ ឬមាត់ , ត្រូវចម្អិនសាច់ឬស៊ុតឲ្យបានឆ្អិនល្អ និងចៀសវាងប៉ះពាល់ជាមួយសត្វព្រៃរស់ ឬកន្លែងចិញ្ចឹមសត្វដោយគ្មានពាក់សម្ភារការពារខ្លួន ៕
ប៊ុន រិទ្ធី
