សៀមរាប ៖ នៅសាលប្រជុំសាលាខេត្តសៀមរាប មានបើកសិក្ខាសាលាឆ្លុះបញ្ចាំងលទ្ធផលការងារនៃការអនុវត្តផែនការសកម្ម ភាព ឆ្នាំ២០២១ និងទិសដៅអនុវត្តបន្តឆ្នាំ២០២២ របស់គណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត ក្រោមអធិបតីភាពឯកឧត្តម តោ គឹមស៊ាន សមាជិកក្រុមប្រឹក្សាខេត្ត លោកជំទាវ យូ សុភា អភិបាលរងនៃគណៈអភិបាល ខេត្ត និង លោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត ដោយមានការចូលរួមពីអស់លោក លោកស្រីជាសមាជិកសមាជិកាគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត ក្រុង ស្រុក គណៈកម្មាធិការកិច្ចការនារីនិងកុមារ ឃុំ សង្កាត់ និង បណ្តាអង្គការដៃគូរ ចូលរួមជាសមាជិកសមាជិកា នៃអង្គសិក្ខាសាលា ចំនួន ១៥១នាក់ ស្រី ៩៧នាក់ ។
ក្នុងកិច្ចស្វាគមន៍របស់លោកជំទាវ ស៊ិន ណម ប្រធានគណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត បានបញ្ជាក់ថា អង្គសិក្ខាសាលាឆ្លុះបញ្ជាំងពីលទ្ធផលការងារ នៃការអនុវត្តផែនការសកម្មភាព ឆ្នាំ២០២១ និងលើកទិសដៅបន្ត ឆ្នាំ២០២២ ក្នុងគោលបំណង ដើម្បីឆ្លុះបញ្ចាំងលទ្ធផលសម្រេចបាន បញ្ហាប្រឈម និងដំណោះស្រាយ នៃការអនុវត្តតួនាទី ភារកិច្ចរបស់ គ.ក.ស.ក ខេត្ត និងបណ្តាវិស័យរបស់ខ្លួនដែលបានធ្វើសកម្មភាពក្នុងការជំរុញគាំទ្រ និងដោះស្រាយបញ្ហាទាំងឡាយដែលកើតមានឡើងចំពោះស្ត្រី យុវវ័យ កុមារ និងជនងាយរងគ្រោះក្នុងរយៈពេលពេញមួយឆ្នាំ២០២១ កន្លងមកនេះ។ ម្យ៉ាងទៀត សិក្ខាសាលានេះ ក៏ជាការរកធាតុចូល ដើម្បីធ្វើការកែលម្អតម្រង់ទិសបន្ថែមដល់បណ្តាវិស័យរបស់ខ្លួនឲ្យកាន់តែមានភាពល្អប្រសើរឡើងថែមទៀត ។ លើសពីនេះ យើងបានចូលរួមក្នុងការកសាងចក្ខុ វិស័យជាយុទ្ធសាស្ត្រ ដើម្បីអភិវឌ្ឍន៍ក្នុងដែនសមត្ថកិច្ចរបស់ក្រុមប្រឹក្សា និងបានសហការជាមួយវិស័យ ពាក់ព័ន្ធផ្សេងៗ និងសមត្ថកិច្ច ក្នុងការដោះស្រាយបញ្ហាដែលកើតមានឡើងចំពោះស្ត្រី និងកុមារនៅនឹងមូលដ្ឋាន។
មានប្រសាសន៍បើកអង្គសិក្ខាសាលានាឱកាសនោះលោក ជំទាំវ យូ សុភា បានសម្តែងនូវការកោតសរសើរ និងអបអរសាទរដល់លោកជំទាវប្រធានគ.ក.ស.ក ខេត្ត ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកា គ.ក.ស.ក ខេត្ត និងអ្នកពាក់ព័ន្ធទាំងអស់ ដែលបានខិតខំប្រឹងប្រែងអស់ពីកម្លាំងកាយចិត្តក្នុងការអនុវត្តតួនាទី ភារកិច្ចរបស់ខ្លួនអស់រយៈពេលពេញមួយឆ្នាំ ដើម្បីលើកកម្ពស់ការយល់ដឹងពីតម្រូវការរបស់ស្ត្រី យុវវ័យ កុមារ និងជនងាយរងគ្រោះ ព្រមទាំងបង្កើនភាពអង់អាចដល់ស្ត្រីក្នុងក្របខណ្ឌ នៃរដ្ឋបាលថ្នាក់ក្រោមជាតិ ។ ការអនុវត្តតួនាទី ភារកិច្ចនេះទទួលបានជោគជ័យ និងមានប្រសិទ្ធភាពល្អអាស្រ័យដោយមានការគាំទ្រ សហការយ៉ាងជិតស្និទ្ធរបស់ស្ថាប័នពាក់ព័ន្ធ ដៃគូអភិវឌ្ឍន៍ និងអង្គការសង្គមស៊ីវិល ដែលក្រុមការងារនឹងធ្វើបទបង្ហាញអំពីសមិទ្ធផលនាពេលបន្តិចទៀតនេះ។
ម្យ៉ាងវិញទៀត ច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ និង លិខិតបទដ្ឋានពាក់ព័ន្ធ ក៏បានចែងនូវបញ្ញត្តពាក់ព័ន្ធការរៀបចំឡើងវិញនូវរចនាសម្ព័ន្ធ ប្រព័ន្ធគ្រប់គ្រងរដ្ឋបាលថ្នាក់ក្រោមជាតិមានរាជធានី ខេត្ត ក្រុង ស្រុក ខណ្ឌ ដែលធានាដល់ការលើកកម្ពស់សមភាពយេនឌ័រ សមធម៌សង្គម បរិយាប័ន្ន ទាំងការតែងតាំង និងការគ្រប់គ្រងបុគ្គលិក ការរៀបចំផែនការអភិវឌ្ឍន៍ ការរៀបចំថវិកា ព្រមទាំងបានបង្កើត នូវយន្តការ និងនីតិវិធីនានា ដើម្បីធានាបញ្ហាស្ត្រី យុវវ័យ កុមារ និងក្រុមជនងាយរងគ្រោះត្រូវបានយកចិត្តទុកដាក់ក្នុងកិច្ចដំណើរការ នៃការសម្រេចចិត្តរបស់ក្រុមប្រឹក្សារដ្ឋបាលថ្នាក់ក្រោមជាតិ។
លោកជំទាវ បានបញ្ជាក់ថា ពាក់ព័ន្ធនឹងគោលបំណងកំណែទម្រង់នានា របស់រាជរដ្ឋាភិបាលកម្ពុជាដែលកំពុងយកចិត្តទុកដាក់អនុវត្តនាពេលបច្ចុប្បន្ន ក្នុងគោលបំណងលើកកម្ពស់ការផ្តល់សេវាសាធារណៈជូនប្រជាពលរដ្ឋឲ្យកាន់តែមានប្រសិទ្ធភាព ដើម្បីលើកកម្ពស់ការអភិវឌ្ឍសេដ្ឋកិច្ចមូលដ្ឋានប្រកបដោយសមធ៌ម តម្លាភាព គណនេយ្យភាព និងបរិយាប័ន្ន សំដៅកាត់បន្ថយភាពក្រីក្ររបស់ប្រជាពលរដ្ឋ។ ក្រោមការដឹកនាំដ៏ត្រឹមត្រូវរបស់ប្រមុខរាជរដ្ឋាភិបាល ទីក្រុងសៀមរាបត្រូវបានចាត់បញ្ចូលជាទីក្រុងវប្បធម៌អាស៊ាន ឆ្នាំ២០២០-២០២២ ដែលនេះជាមោទនភាពរបស់ប្រជាជនកម្ពុជាទាំងមូល ក៏ដូចជាប្រជាជនខេត្តសៀមរាប។
ស្របពេលដែលស្ថានភាព នៃការរីករាលដាលនៃជម្ងឺកូវីដ-១៩ មានសភាពស្ងប់ស្កាត់ រាជរដ្ឋបាលកម្ពុជាក៏បានបើកប្រទេសឡើងវិញ ដើម្បីធ្វើឱ្យកំណើនសេដ្ឋកិច្ចជាតិវិលទៅរកប្រក្រតីភាពឡើងវិញ។លោកជំទាវ មានសង្ឃឹម ជឿជាក់ផងដែរថា អង្គសិក្ខាសាលាទាំងមូលនឹងធ្វើការលើកឡើងនូវបញ្ហាប្រឈមនិងដំណោះស្រាយឲ្យបានផុល ផុសដើម្បីស្វែងរកធាតុចូលសំដៅធ្វើយ៉ាងណាឲ្យសមាជិក សមាជិកានៃអង្គសិក្ខាសាលា សំខាន់ប្រធាន គ.ក.ស.ក បានអភិវឌ្ឍន៍សមត្ថភាពបន្ថែមទៀត ដើម្បីយកទៅធ្វើនវានុវត្តន៍នៅមូលដ្ឋានរបស់ខ្លួនឲ្យមានប្រសិទ្ធភាពខ្ពស់ ៕
