ខេត្តកំពង់ចាម ៖ នៅព្រឹកថ្ងៃទី ២៨ ខែកញ្ញា ឆ្នាំ២០២១ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងជាប្រធានគណៈកម្មការសុរិយោដីថ្នាក់ខេត្ត បានដឹកនាំកិច្ចប្រជុំ កំណត់នីតិវិធីក្នុងការដោះស្រាយបញ្ចប់ករណីទំនាស់ដីធ្លី ចំនួន០២ករណី នៅស្រុកជើងព្រៃ ករណីទី១ ករណីដីជា ប្រវត្តិ ជិតព្រំប្រទល់រដ្ឋបាល ស្រុកបាធាយ ក្នុងនោះប្រជុំដោះស្រាយ ករណី ស្នើសុំឈូសឆាយដីចំការ 89817,13(m2) និងធ្វើ(ប្លង់)បណ្ណ័កម្មសិទ្ធិ របស់ ប្រជាពលរដ្ឋ រស់នៅរាជធានីភ្នំពេញដែលបានស្នើសុំអន្តរាគមន៍ឲ្យជួយដោះស្រាយ កាលពីថ្ងៃទី២៣ ខែសីហា ឆ្នាំ២០២១ ។
ជាលទ្ធផលករណីទី១៖ ឯកឧត្តមអភិបាលខេត្ត បានកំណត់ឲ្យ មន្ទីរជំនាញ ថ្នាក់ស្រុក,ឃុំ និង ការិយាល័យជំនាញ ចុះកំណត់ទំហំ ដោយមានធ្វើកិច្ចសន្យា និងលក្ខខណ្ឌ័ ច្បាស់លាស់ ក្នុងការគ្រប់គ្រង និងការប្រើប្រាស់ឲ្យបានត្រឹមត្រូវ ជាដីបំរុងទុករបស់រដ្ឋ និង មិនអនុញ្ញាតិឲ្យមានការចុះបញ្ជីជាដីកម្មសិទ្ធិរបស់បុគ្គលណា ឬឯកជនណាមួយឡើយ ដោយគ្រាន់តែមានការអនុញ្ញាតិឲ្យសមីខ្លួន បន្ត អាស្រ័យផលដាំស្វាយចន្ទី មួយចំណែកតែប៉ុណ្ណោះ។
ករណីទី២ ប្រជុំសម្រេចកំណត់នីតិវិធីក្នុងការដោះស្រាយបញ្ចប់ ករណីទំនាស់ដី រវាងគូភាគី ដែលមានដី នៅភូមិរវាង ឃុំខ្នុរដំបង ស្រុកជើងព្រៃ ។ ជាលទ្ធផលករណីទី២៖ សម្រេចឲ្យក្រុមការងារខេត្ត បន្តចុះដោះស្រាយកំណត់តាមនិយាមការលើផែនទីគំនូសបង្ហាញទី៥ តាមកិច្ចប្រជុំដែលបានសម្រេចពេលនេះ ដោយអនុវត្តតាមគោលនយោបាយឈ្នះឈ្នះ បន្ទាប់ពីមានការដោះស្រាយ និងមានផែនទីគំនូសបង្ហាញចំនួន០៤លើកចុងក្រោយនេះ ទាំងនៅថ្នាក់ស្រុក និងថ្នាក់ខេត្ត និងនៅសាលាដំបូងខេត្ត ក្រោយពេលដែលសាលាឧទ្ទរណ៍ បានសម្រេចប្រគល់ការដោះស្រាយនៅរដ្ឋបាលខេត្តវិញ៕
