ខេត្តពោធិ៍សាត់= ប្រភពស្និទ្ធនឹងឈ្មួញឈ្មោះ កោះ សំភី ហៅតាហយ បានឲ្យដឹងថា មន្ដ្រីមានស័ក្កយសយកអំណាចយោធាមានផ្កាយលើស្មារមកប្រព្រឹត្តបទល្មើសកាប់ឈើមិនខ្លាចរអាពីសំណាញច្បាប់សោះឡើយ !បទល្មើសទាំងនេះបើគ្មានការបើកដៃពីមន្ត្រីបរិស្ថានក្នុងតំបន់ដែនជម្រកសត្វព្រៃភ្នំឱរ៉ាល់ ទេនោះគឺឈ្មួញរូបនេះមិនអាចកាប់ឈើនិងប្រើប្រាស់រថយន្តជាច្រើនគ្រឿងដឹកជញ្ជូនឈើចេញពីព្រៃបានឡើយ។
បច្ចុប្បន្នការកាប់ឈើនិងប្រើប្រាស់រថយន្តម៉ាកបង្កុង ជាច្រើនគ្រឿងដឹកជញ្ជូនឈើចេញពីព្រៃ យកមករក្សាទុកក្នុងភូមិបំណក់ ឃុំឈើតុំ ស្រុកក្រគរ យ៉ាងពេញបន្ទុក ! បែរជាលោក ឡាយ វិសិដ្ឋ ប្រធានមន្ទីរកសិកម្មខេត្តពោធិ៍សាត់ និងមេរដ្ឋបាលព្រៃឈើខេត្តពោធិ៍សាត់ ក៏មិនហ៊ានប៉ះពាល់ឈ្មួញឈ្មោះ កោះ សំភី ហៅតាហយ ជាមន្ត្រីយោធានោះឡើយ។
រីឯលោក ម៉ៅ ធនិន អភិបាលខេត្តពោធិ៍សាត់ និងលោក គង់ ពុទ្ធីរ៉ា ប្រធានមន្ទីរបរិស្ថានខេត្តពោធិ៍សាត់ ដែលចូលកាន់តំណែងជំនួសលោក ប៉ាន់ មរកត មិនចាត់វិធានការទប់ស្កាត់បទល្មើសព្រៃឈើក្នុងតំបន់ដែនជម្រកសត្វព្រៃភ្នំឱរ៉ាល់នោះដែរ ។
ប្រជាពលរដ្ឋក្នុងឃុំឈើតុំ ស្រុកក្រគរ បានអំពាវនាវឲ្យថ្នាក់ដឹកនាំគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ និងឯកឧត្តម សៅ សុខា មេបញ្ចាការកងរាជអាវុធហត្ថលើផ្ទៃប្រទេស បើកការស៊ីបអង្គេតលោកមន្ដ្រីយោធា មានផ្កាយលើស្មាររកស៊ីកាប់បំផ្លាញព្រៃឈើទាំងនោះនិង ចាត់វិធានការបង្ក្រាបឈ្មួញឈ្មោះ កោះ សំភី ហៅតាហយ ដែលកំពុងបំផ្លាញព្រៃឈើនៅតំបន់ដែនជម្រកសត្វព្រៃភ្នំឱរ៉ាល់ និងតំបន់ជួរភ្នំក្រវាញនេះផងបើមិនដូច្នោះទេនិងវិនាសមហន្តរាយជាមិនខាន។
