ខេត្តកំពង់ធំ៖ ក្រោយពីមានជម្លោះដ៏ចម្រូងចម្រាស់រវាងពលរដ្ឋ ជាមួយសមត្ថកិច្ច រឿងចាប់ត្រាក់ទ័រ នៅស្រុកប្រាសាទបល្ល័ង្គរួចមក ទីបំផុត ត្រូវបានលោក ស៊ិន វិរះ ព្រះរាជអាជ្ញាអមសាលាដំបូងខេត្តកំពង់ធំបានបញ្ជាក់អោយពលរដ្នដឹងថា សូមឱ្យប្រជាពលរដ្ឋដាក់ពាក្យស្នើសុំនៅសាលាដំបូងខេត្តកំពង់ធំដើម្បីយកត្រាក់ទ័រយកទៅវិញដើម្បីអោយទាន់រដូវធ្វើស្រែ ហើយលោកនឹងសម្របសម្រួលប្រគល់ត្រាក់ទ័រជូនប្រជាពលរដ្ឋវិញ ក្នុងពេលឆាប់ៗខាងមុខនេះ។
លោក ស៊ិន វីរះនាព្រឹកថ្ងៃ ទី០៦ ខែសីហា ឆ្នាំ២០២១នេះបានឆ្លើយតបនូវសំនួរសួរថា តើត្រាក់ទ័រដែលបានចាប់នៅស្រុកប្រាសាទបល្ល័ង្គនោះ និងប្រគល់អោយពលរដ្នវិញនៅថ្ងៃណា? លោកក៏បានឆ្លើយតបតាមប្រព័ន្ធតេលេក្រាមថា នៅថ្ងៃច័ន្ទ ខាងមុខនេះ លោកនិងពិនិត្យសំណុំរឿងសិន។
ប្រសាសន៍របស់លោក ស៊ិន វិរះ បានលើកឡើងបន្ទាប់ពីប្រជាពលរដ្ឋទទួចស្នើរសុំត្រាក់ទ័រចំនួន ២គ្រឿង ដែលសមត្ថកិច្ចចាប់យកទៅទុកនៅស្នងការដ្ឋាននគរបាលខេត្តកំពង់ធំ កាលពីថ្ងៃទី១៧ ខែកក្កដា ឆ្នាំ២០២១ កន្លងទៅ ដោយសមត្ថកិច្ចចោទប្រកាន់ថា ប្រជាពលរដ្ឋឈូសដីព្រៃគម្របព្រៃឈើ នៅមូលដ្ឋានភូមិតាមុំ ឃុំដូង ស្រុកប្រាសាទបល្ល័ង្ក ខេត្តកំពង់ធំ។
លោក ស៊ិន វិរះ បានបញ្ជាក់ទៀតថា ស្ថាប័នអយ្យការអមសាលាដំបូងខេត្តកំពង់ធំ ក៏នឹងបន្តសួរនាំភាគីពាក់ព័ន្ធបន្ថែមទៀតអំពីការរឹបអូសត្រាក់ទ័ររបស់ប្រជាពលរដ្ឋ និងករណីជំរិតទារប្រាក់ជាដើម៕
