កំពង់ធំ៖ លោក យ៉ូវ សេងគុណ នាយករដ្ឋបាលខេត្តកំពង់ធំនៅព្រឹកថ្ងៃទី២៨ ខែមេសា ឆ្នាំ២០២១បានដឹកនាំមន្ដ្រីនៃមន្ទីរពាក់ព័ន្ធ ចុះពិនិត្យទីតាំងជីកយកអាចម៍ដីជាក់ស្តែង ដែលក្រុមហ៊ុនឯកជនកំពុងប្រកបអាជីវកម្មជីក និងដឹកអាចម៍ដី ក្នុងតំបន់ភូមិក្តីដូង ឃុំក្តីដូងស្រុកកំពុងស្វាយ ខេត្តកំពង់ធំ។
លោក យ៉ូវ សេងគុណ បញ្ជាក់ថារណ្តៅដីនៅតំបន់នេះមានជម្រៅជ្រៅ ហួសខុសទៅនឹងច្បាប់អាជីវកម្មដែលបានអនុញ្ញាត្តិ ! ដូច្នេះក្រុមហ៊ុនទាំងអស់កំពុងប្រកបអាជីវកម្មនៅទីតាំងខាងលើ នឹងត្រូវធ្វើការពិន័យរដ្ឋបាលតាមច្បាប់ ស្តីពីការគ្រប់គ្រង និងការធ្វើអាជីកម្មធនធានរ៉ែ។
នៅក្នុងសកម្មភាពព្រឹកនេះដែរ រូបលោក និងមន្ទីរជំនាញឃាត់គ្រឿងចក្រពីរគ្រឿង (អេស្ការកាយដី) រក្សាទុកនៅប៉ុស្តិ៍នគរបាលរដ្ឋបាលក្តីដូង រង់ចាំម្ចាស់ចូលខ្លួនដោះស្រាយពិន័យទៅតាមផ្លូវច្បាប់! ចំពោះរណ្តៅផ្សេងទៀតរូបលោកផ្ទាល់ និងក្រុមការងារ នឹងបន្តចុះវាស់វែងជាក់ស្តែង ព្រមទាំងធ្វើការពិន័យទៅតាមច្បាប់ដូចគ្នា។
លោក ណឹម ចន្ថា ប្រធានមន្ទីរ រ៉ែនិងថាមពល ខេត្តកំពង់ធំ បានឆ្លើយក្នុងតបតាមប្រព័ន្ធតេលេក្រាមថា អាជ្ញាបណ្ណមានចេញដោយខេត្ត និងក្រុង ស្រុក មន្ទីររ៉ែ មិនមានសិទ្ធិចេញអាជ្ញាបណ្ណទេ៖
-ចេញដោយខេត្ត ជីកជម្រៅ៥ម
-ចេញដោយរដ្ឋបាលក្រុង/ស្រុក ជីកជម្រៅ៣ម៕
