មន្ទីរពេទ្យបង្អែក២កន្លែង និងមណ្ឌលសុខភាពចំនួន២០ទីតាំងផ្សេងទៀតនៅក្នុងខេត្តសៀមរាប ដែលប្រតិបត្តិការដោយគ្រូពេទ្យជំនាញចំនួន២៤ក្រុម បានដំណើរការយុទ្ធនាការចាក់វ៉ាក់សាំងស៊ីណូវ៉ាក់បង្ការកូវីដ-១៩ ស្របពេលដែលដើមខែមេសានេះ ដំណើរការវិភាគចុងក្រោយ របស់អង្គការសុខភាពពិភពលោក (WHO) បានមើលឃើញថា វ៉ាក់សាំងប្រឆាំងកូវីដ១៩ ផលិតដោយប្រទេសចិន ស៊ីណូវ៉ាក់ និង ស៊ីណូហ្វាម ) មានប្រសិទ្ធភាពគ្រប់គ្រាន់តាមលក្ខខណ្ឌរបស់ WHO ហើយ ។ នៅព្រឹកថ្ងៃទី០២ ខែមេសា នេះ ឯកឧត្តម ទៀ សីហា អភិបាលខេត្ត បានអញ្ជើញចុះ ពិនិត្យនៅតាមគោលដៅ ក្នុងការចាក់វ៉ាក់សាំង បង្ការជម្ងឺកូវីដ-១៩ (ស៊ីណូវ៉ាក់) ក្នុងខេត្ត និយាយដោយឡែក នៅមន្ទីរ ពេទ្យបង្អែកខេត្ត ក៏មានវត្តមានរបស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត រួមទាំងឯកឧត្តម លោកជំទាវជាសមាជិកសមាជិកាក្រុមប្រឹក្សខេត្ត គណៈអភិបាលខេត្ត រួមទាំងភរិយា និង ថ្នាក់ដឹកនាំមន្ទីរ មន្ត្រីរាជការ បានអញ្ជើញទៅ ទទួលការចាក់ វ៉ាក់សាំងបង្ការជម្ងឺកូវីដ-១៩ (ស៊ីណូវ៉ាក់) ។
វ៉ាក់សាំងបង្ការជម្ងឺកូវីដ-១៩ (ស៊ីណូវ៉ាក់) បានដឹកជញ្ជូនមកដល់ខេត្តសៀមរាប នាយប់ថ្ងៃទិ៣១ ខែមីនា និងត្រូវបានដឹកជញ្ជូនបែងចែកបន្តទៅតាមបណ្តាគោលដៅនានា ក្នុងថ្ងៃទី០១ ខែមេសា ដែលមាន២២គោលដៅ ។ យោងតាមការឲ្យដឹងដោយ លោក ក្រុស សារ៉ាត់ ប្រធានមន្ទីរសុខាភិបាលខេត្ត ។ ក្នុងដំណើររួមគ្នានៅក្នុងយុទ្ធនាការចាក់វ៉ាក់សាំងស៊ីណូវ៉ាក់ ដែលបានដាក់ចេញដោយគណៈកម្មការចំពោះកិច្ចនោះ នៅខេត្តសៀមរាប យុទ្ធនាការនេះ ត្រូវបានចាប់ផ្តើមដំណើរការដំបូង ថ្ងៃទី០២ ខែមេសា ឆ្នាំ២០២១។
តាមការបញ្ជាក់របស់ឯកឧត្តម ទៀ សីហា បានឲ្យដឹងថា នៅក្នុងផែនការគ្របដណ្តប់ការងារចាក់វ៉ាក់សាំងប្រឆាំងជម្ងឺកូវីដ-១៩ មន្ទីរសុខាភិបាលខេត្តសៀមរាប បានបង្ហាញឲ្យដឹងថា លើគោលដៅទាំង១២ក្រុង-ស្រុក ត្រូវបានអនុគណៈកម្មការចំពោះកិច្ច រៀបចំឲ្យមានទីតាំងចាក់វ៉ាក់សាំងនេះចំនួន២២កន្លែង ក្នុងនោះរួមមាននៅមន្ទីរពេទ្យបង្អែកខេត្តសៀមរាប និងមន្ទីរពេទ្យបង្អែកសូទ្រនិគម ប្រតិបត្តិការដោយគ្រូពេទ្យចំនួន៤ក្រុម និងគ្រូពេទ្យចំនួន២០ក្រុមផ្សេងទៀត ត្រូវបានដាក់ពង្រាយនៅតាមបណ្តាមណ្ឌលសុខភាពចំនួន២០ទីតាំងទូទាំងខេត្ត។ ឯកឧត្តមបន្តទៀតថា នៅក្នុងផែនការគ្របដណ្តប់របស់មន្ទីរសុខាភិបាល បានបង្ហាញថា សម្រាប់មួយថ្ងៃបូងនៃការចាក់ វ៉ាក់សាំងប្រឆាំងជម្ងឺកូវីដ១៩ ( ស៊ីណូវ៉ាក់ ) ផលិតនៅប្រទេសចិន ប្រមាណជា ៤ ពាន់ដូស ត្រូវបានចាក់ជូនមន្ត្រីរាជការជុំវិញខេត្ត មន្ត្រីរដ្ឋបាលមូលដ្ឋានគ្រប់លំដាប់ថ្នាក់ រួមទាំងមន្ត្រីបុគ្គលិកចូលនិវត្តផងដែរ តាមគោលការណ៍ស្ម័គ្រចិត្ត មិនគិតកម្រៃ និងមិនប្រកាន់និន្នាការអ្វីនោះឡើយ ។ ឯកឧត្តមបានបញ្ជាក់ថា ក្នុងយុទ្ធនាការនេះ យើងធ្វើការចាក់ជូនដល់មន្ត្រីរាជការ អាជ្ញាធរមូលដ្ឋាន មានចំនួន ១៥ពាន់នាក់ ។
វ៉ាក់សាំងស៊ីណូវ៉ាក់ និង ស៊ីណូហ្វាម ត្រូវបានចរាចរណ៍ប្រើប្រាស់នៅលើបណ្តាប្រទេសជាច្រើនក្នុងពិភពលោក ឆ្លើយតបទៅនឹងការរាតត្បាតនៃជម្ងឺកូវីដ-១៩ ។ ក្រោមចំណងជើងថា៖ ទីបំផុត ទៅ ! អង្គការសុខភាពពិភពលោក សម្រេចថា វ៉ាក់សាំងចិន មានប្រសិទ្ធភាពគ្រប់គ្រាន់តាមលក្ខខណ្ឌរបស់ WHO ហើយ ត្រូវបានចេញផ្សាយដោយគេហទំព័រក្នុងស្រុកកាលពីថ្ងៃទី០១ខែមេសានេះ ដោយយោងតាមប្រភពព័ត៌មានពីបរទេស ( CGTN ) ។
លោកវេជ្ជបណ្ឌិត Alejandro Cravioto ប្រធានក្រុមជំនាញរបស់អង្គការសុខភាពពិភពលោក បង្ហើបឲ្យដឹងថា វ៉ាក់សាំងបង្ការជម្ងឺកូវីដ-១៩ ( ស៊ីណូវ៉ាក់ និង ស៊ីណូហ្វាម ) កំពុងស្ថិតក្នុងដំណើរការវិភាគចុងក្រោយរបស់អង្គការសុខភាពពិភពលោក ហើយអាចនឹងត្រូវសម្រេចឆាប់ៗនេះ សម្រាប់ការដាក់ប្រើប្រាស់ជាផ្លូវការ ព្រោះវាមានប្រសិទ្ធភាពគ្រប់គ្រាន់តាមលក្ខខណ្ឌរបស់WHOហើយ ហើយសេចក្តីប្រកាសការសម្រេចចិត្តនោះ អាចនឹងធ្វើឡើងជាសាធារណៈ នាអំឡុងដើមខែមេសាឆ្នាំ២០២១នេះ ៕
