កំពង់ធំ ៖ សេចក្តីរាយការណ៍បានឲ្យដឹងថា បច្ចុប្បន្ននេះ ឈ្មួញដឹកជញ្ជូន និងប្រមូលទិញអុសព្រៃចម្រុះ និងដឹកជញ្ជូនចេញទៅលក់បន្តយ៉ាងមមាញឹកជារៀងរាល់ថ្ងៃរបស់ឈ្មួញ ឈ្មោះ ធានី ដោយមិនខ្លាចក្រែងរអារនឹងសមត្ថកិច្ចពាក់ព័ន្ធ និងអាជ្ញាធរមូលដ្ឋាន ។
សកម្មភាពនេះ មហាជនដាក់ជាសំណួរងឿងឆ្ងល់យ៉ាងខ្លាំងថា តើអាជ្ញាធរមូលដ្ឋាន រួមនិងសមត្ថកិច្ចជំនាញពាក់ព័ន្ធមិនដឹងទេឬយ៉ាងណាបានជាបណ្តែតបណ្តោយយ៉ាងដូច្នេះ?
យោងតាមប្រភពខាងលើបានឲ្យដឹងថា ឈ្មួញដែលដឹក ជញ្ជូនផលអនុផលព្រៃឈើចម្រុះ យ៉ាងសកម្មនោះ មាន ឈ្មោះ ធានី រស់នៅភូមិពពេជ ឃុំចុងដូង ស្រុកបារាយណ៍ ខេត្តកំពង់ធំ ។
ក្នុងការដឹកជញ្ជូនអុសព្រៃចម្រុះខាងលើនេះដោយប្រើមធ្យោបាយឡានកូរ៉េចំណុះពីរតោនកន្លះ ពណ៌សមួយគ្រឿងពាក់ ផ្លាកលេខ កំពង់ចាម 3A 1926 ដោយប្រមូលទិញនិងដឹកចេញ ពីចំណុចភូមិសំបួរ ឃុំពពក ស្រុកស្ទោង ខេត្តកំពង់ធំ យ៉ាងគគ្រឹកគគ្រេងតែ គេសង្កេតឃើញថាសមត្ថកិច្ចជំនាញ និងសមត្ថកិច្ចពាក់ព័ន្ធមាក់រក្សាភាពស្ងៀមស្ងាត់ធ្វើមិនដឹងមិនលឺ ខណៈសកម្មភាពទាំងនេះប្រឆាំងបទបញ្ជារបស់ប្រមុខរាជរដ្ឋាភិបាល ដែលតែងតែដាក់បទបញ្ជាយ៉ាងម៉ឺងម៉ាត់លើការ ទប់ស្កាត់និងបង្ក្រាបរាល់បទល្មើសបំផ្លាញធន ធានធម្មជាតិគ្រប់រូបភាព។
ករណីនេះ មហាជនមានចម្ងល់ថា តើមន្ត្រីជំនាញពាក់ព័ន្ធទាំងអស់នៅក្នុងមូលដ្ឋាន បានជ្រាបដែលឬទេ? បើបទល្មើសទាំងនោះដឹកកាត់ស្នាក់ការ ដែលមានមន្ត្រីជំនាញឈរជើងនៅទីនោះជាច្រើនកន្លែងផងដែរ ឬមួយថាមន្ត្រីជំនាញទាំងនោះ ដេកបិទភ្នែក តែដៃប្រមូលលាភ សក្ការៈ ទើបមើលមិនឃើញឡានទាំងនោះ។ បើសិនជានៅបណ្តែតបណ្តោយបែបនេះព្រៃឈើក្នុងតំបន់នោះនឹងរងការកាប់បំផ្លាញយ៉ាងរង្គាលហិនហោចមិនខាន ។
មហាជនសូមសំណូមពរដល់មន្ទីរពាក់ព័ន្ធ ជាពិសេសលោក ប៉ែន វណ្ណារិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ មេត្តាចាត់វិធានការចាត់មន្ត្រីក្រោមឱវាទ ធ្វើការបង្ក្រាបទប់ស្កាត់ បទល្មើសព្រៃឈើអោយបានតាន់ពេលវេលា ខណៈដែលព្រៃឈើនៅសល់បន្តិចបន្តួចនេះឲ្យបានគង់វង្សផង។
សូមបញ្ជាក់ថា យោងតាមច្បាប់រដ្ឋបាលព្រៃឈើ ក្នុងមាត្រា ៩៦ ត្រូវទទួលពិន័យ អន្តរការណ៍ពីរដ្ឋបាលព្រៃឈើ ជាប្រាក់ចំនួនពីពីរ (២)ទៅ បី(៣) ផង នៃតម្លៃវត្ថុតាងពិតប្រាកដ នៅទីផ្សារ ចំពោះជនណា ដែលបានប្រព្រឹត្តបទល្មើសណាមួយ។ មាត្រា ៩៧- ត្រូវផ្ដន្ទាទោស ក្រោមបទល្មើសព្រៃឈើថ្នាក់ទី ១ ដែលត្រូវជាប់ពន្ធនាគារពីប្រាំ (៥)ឆ្នាំ ទៅដប់ (១០)ឆ្នាំ និងត្រូវរឹបអូសវត្ថុតាងទាំងអស់មកជាសម្បត្តិរដ្ឋ ដកហូតកិច្ចព្រមព្រៀង អាជ្ញាប័ណ្ណ លិខិតអនុញ្ញាត និងកំទេចចោលវត្ថុតាងក្លែង ចំពោះជនណាដែលបានប្រព្រឹត្តបទល្មើស។ និងមាត្រា៩៨-ត្រូវផ្ដន្ទាទោសក្រោមបទល្មើសព្រៃឈើថ្នាក់ទី ២ ដែលត្រូវជាប់ពន្ធនាគារពីមួយ (១)ឆ្នាំ ទៅប្រាំ (៥) ឆ្នាំ និងត្រូវផ្តន្ទាទោសពិន័យជាប្រាក់ពីដប់លាន (១០.០០០.០០០) រៀល ទៅមួយរយលាន (១០០.០០០.០០០)រៀល ឬផ្តន្ទាទោសណាមួយនៃទោសទាំងពីរ វត្ថុតាងទាំងអស់ ត្រូវរឹបអូសមកជាសម្បត្តិរដ្ឋ ចំពោះជនណា ដែលបានប្រព្រឹត្តល្មើស ៕
